José María Seijas: «O comercio non desaparecerá, porque onde está, hai vida»

A informatización e as redes sociais son dúas das materias pendentes das pequenas tendas, defende o presidente da Federación Galega de Comercio


lugo / la voz

Os pequenos comercios de Galicia teñen que adaptarse aos novos hábitos de consumo, nos que Internet xoga un papel moi importante. A aposta pola dixitalización debe ser inmediata para que os negocios poidan competir cos xigantes empresariais. Así o explica o presidente da Federación Galega do Comercio, José María Seijas.

-Cal é a situación actual do pequeno comercio en Galicia?

-É coma a de moitos outros sectores. Agora case todo está en retroceso, algo que eu achaco a varias circunstancias. En primeiro lugar, á incerteza política, posto que non sabemos nin o que vai acontecer nin quen vai dirixir o país. Hai tempo pedimos unha entrevista coa ministra de Industria, Comercio e Turismo, Reyes Maroto, para regular as datas das rebaixas. Estamos agardando a poder resolvela.

-En que inflúe o que vostede denomina como incerteza política?

-Pois en que a confianza do consumidor baixou notablemente, por iso non hai unha subida nas ventas que mereza a pena destacar.

-Cales son as perspectivas de futuro?

-Nesto é no que estamos a traballar. Hai unha transformación dos hábitos de compra dos consumidores e temos que adaptarnos. O comerciante ten que potenciar a venta física e a on-line, e ten que prepararse para estar nas redes sociais como fan os demais.

-A transformación dixital é algo que acontece en moitos ámbitos dende hai anos.

-Así é. Cando chegaron as primeiras grandes superficies, xa houbo que facer unha gran transformación. Agora acontece o mesmo. Dende a federación estamos traballando para informatizar os comercios para actualizalos e así estar á altura dos demais.

-Empresas como Amazon danan o pequeno comercio dalgún xeito?

-Amazon e Aliexpress danan o pequeno comercio e tamén o grande. Estamos vendo que grandes firmas como Inditex venden grande parte dos seus produtos por Internet. Agora este é o espazo que hai que cubrir.

-Que precisan os pequenos comerciantes?

-Informatización e redes sociais. É moi importante que se dean a coñecer e que poidan ensinar os seus produtos á xente de todo o país. Tamén é preciso regular as rebaixas, algo que depende do Goberno directamente. Teríamos que facer un estudo e mirar se fai falla cambiar as datas en que se fan.

-As grandes cidades de Galicia ven como as súas tendas pechan a diario.

-Este é un problema a nivel nacional e tamén xeracional. Hai xente nova abrindo comercios con novas metodoloxías e especialidades e os demais deben actualizarse. O comercio non pode desaparecer, porque onde hai comercio, hai vida.

-Cal é o papel das administracións?

-Deben buscar solucións. A xente vai mercar onde hai aparcamento e bancos para sentarse. É dicir, os concellos deben poñer mobiliario cómodo nas rúas.

-A peonalización dos centros urbanos é prexudicial?

-Para peonalizar ten que haber reunións e sentido común para así buscar solucións. Entón resultaría beneficiosa, pero non chega con por unha sinal e que non pasen coches.

-É fácil emprender hoxe?

-Hai axudas para o comercio. O problema é que o 99 % dos comerciantes somos autónomos con moi poucos dereitos na práctica.

«O comerciante ten que prepararse para estar nas redes sociais, tal como fan os demais»

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Comentarios

José María Seijas: «O comercio non desaparecerá, porque onde está, hai vida»