A directiva dos comerciantes cruceños pon fin ao seu mandato sen ter relevo

Remata o prazo establecido pola xunta directiva da Asociación de Pequenos Empresarios e Comerciantes de Vila de Cruces (Apec) para que se presentaran candidatos a dirixir o colectivo sen que houbese interesados. Para a presidenta Lupe Pampín, que leva presidindo a asociación nos últimos anos, «era algo previsible xa que non se vía a ninguén interesado en facerse cargo da mesma», comenta. O colectivo ten previsto celebrar unha última actividade o próximo 17 de maio; día de feira na vila, xornada na que se conmemora o Día das Letras Galegas e na que sempre promoveron algunha campaña por mor desa data. «As actividades tocan ao seu remate e temos pensado gastar os cartos que nos resten nun sorteo entre a nosa clientela», sentencia a presidenta de Apec. Así dende o pasado 2 de maio, e ata o 17, as persoas que merquen nos comercios asociados poderán facerse con premios de 150, 50 ou 30 euros que serán sorteados o propio día 17 ao fío das 14.00 horas. «Non podemos falar dunha cantidade económica pechada xa que dependerá do que nos quede no banco unha vez nos cobren os últimos recibos, pero deixaremos a conta a cero xa que non imos ter máis actividade», resalta.

A pesar da dimisión da totalidade da directiva e de que se pecharán as contas de Apec a asociación non se dará de baixa. No horizonte mantense a esperanza de que alguén, nalgún momento, poida ter interese pola súa reactivación. «Nunca se sabe. Agora ninguén quere collela pero nun futuro non se sabe, e os trámites para poñela en marcha foron moitos e tamén supuxo un desembolso económico importante, de aí que pensamos en mantela. Nós, que quede claro, que dimitimos pero pensamos que a asociación hai que deixala á espera de mellores momentos», explica Pampín.

A Asociación de Pequenos Empresarios e Comerciantes de Vila de Cruces leva catro anos ofertando todo tipo de iniciativas para os asociados, a pesar de que xa iniciara a súa andaina un ano antes. «Digamos que o colectivo ten cinco anos pero só catro legalmente constituído xa que os trámites como dicía foron lentos, como pasa coas cuestións burocráticas».

Tristeza

Lupe Pampín non esconde a súa tristeza polo peche da asociación coa que se conseguiu unir ao tecido empresarial. «Penso que a colaboración e a comunicación que conseguimos nestes anos co funcionamento da asociación foi o máis positivo. O certo é que non estabas soa, tiñamos un grupo para relacionarnos e intercambiar opinións, agora xa non teremos esa opción», lamenta a presidenta de Apec. No aspecto máis negativo do decorrer asociativo están algúns malos momentos vividos. «Certas críticas que sempre xorden, que non gustan, pero que son inevitables, pero en xeral foi un traballo gratificante», remacha Lupe Pampín.

Queda agora esperar a que, dentro dun tempo e o máis cedo posible, algún empresario ou comerciante do municipio aposte por darlle continuidade á asociación.

---

---

---