Alexandra Torres García, de Cruces, mellor oradora no Parlamento Xove

Para esta alumna do IES Marco do Camballón de Cruces foi a súa estrea neste certame onde quedou finalista co seu grupo


Lalín / la Voz

Alexandra Torres García estuda primeiro de Bacharelato no IES do Camballón de Vila de Cruces e foi elixida a mellor oradora da xornada nos debates do Parlamento Xove que tiveron lugar o pasado sábado. Concursaron dous grupos do centro, cada un integrado por catro alumnos. Son sete rapazas e un rapaz que participaban por primeira vez e que xogaron un moi bo papel. Os contrincantes elíxense por sorteo e os de Cruces tiveron esta vez a mala sorte que no derradeiro lles tocou enfrontarse entre eles. O grupo de Alexandra, acadou o carto posto e o outro a décima posición quedando ás portas da final.

Pero fixeron un debate brillante que lles valeu os parabéns e que lles preguntaran, como conta Alexandra, «a ver que nos daban de comer nas Cruces». «Estamos moi orgullosos, aínda que non poderaos entrar os dous equipos pero creo que o fixemos moi ben», O tema desta vez era debater sobre si o Estado debería impoñer ou non a vacina. O grupo de Alexandra tocoulle falar en contra e nos dos seguintes defender a postura a favor. Está moi leda de que a seleccionen como mellor oradora. «Non mo cría, estou moi contenta e moi agradecida».

Araceli Costoya, a súa profesora, prepara cada ano os grupos do instituto. No 2019, Lucía Pampín, daquela estudante de primeiro de BAC conseguía o mesmo recoñecemento que Alexandra. As derradeiras semanas os participantes ensaiaron «buscando toda a información que puidemos porque cantos más argumentos mellor te podes desenvolver», apunta Alexandra Torres que defende que o traballo e a participación nos debates «é moi importante porque aprendes a controlar os nervios e a improvisar; estás falando ante o público e perdes tamén ese medo escénico».

En maio terá lugar a fase final. Co covid, os debates tiveron lugar a través de vídeo conferencia con máscara e gardando as distancias. Antes diso ensaiaron tamén todo o protocolo. Alexandra non coñece o Parlamento e agarda que para a final podan ir e debater xa nese escenario o que lles permitiría tamén contactar dun xeito directo co resto dos estudantes doutros centros que participan. De cara a final, di, «traballaremos todo o posible porque hai que aproveitar esta oportunidade». E si chegar é encher, moito mellor.

De cara ao futuro, Alexandra, natural de Besexos, en Cruces, non sabe aínda o que lle gustaría estudar. Apunta que «aínda me queda un ano». De momento entre as súas materias favoritas está a Bioloxía «que me gusta moito e as Matemáticas». Polo de agora non saben aínda o tema sobre o que deberán debater en maior pero están xa desexando coñecelo para pórse a traballar. Na fase final enfrontaranse oito equipos. Despois da emocionante xornada do pasado sábado, xuntos colaborarán, apuntan dende o instituto en preparar a fondo a final co obxectivo de obter, polo menos, din, resultados tan bos coma os deste pasado sábado.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Comentarios

Alexandra Torres García, de Cruces, mellor oradora no Parlamento Xove