O dianteiro xuvenil estivo tres veces esta tempada as ordes de Víctor Fernández
11 feb 2015 . Actualizado a las 17:19 h.O dianteiro xuvenil Roi Peiteado (Vila de Cruces, 1997) afronta a súa segunda tempada na canteira do Deportivo. Neste curso foi tres veces chamado para compartir adestramentos e un partidillo co primeiro equipo de Víctor Fernández. A última vez foi este luns.
-¿Que supón ser un dos xuvenís chamados para adestrar co equipo de Víctor Fernández?
-Eu tómoo como unha experiencia para disfrutar. Se me chama máis veces, moi ben.
-¿Varía moito co que fan habitualmente co seu equipo?
-Non cambia moito. Só nos di que o fagamos o mellor posible e nada máis. É o que hai que facer.
-¿Colleuno por sorpresa que sendo xuvenil o chamaran para adestrar co Deportivo de Primeira División?
-A verdade é que si (sorrí). A primeira vez que me chamaron pensei que me estaban vacilando pero despois xa ben.
-Nestes adestramentos que estiveron cos xogadores do primeiro equipo, ¿danlles algún consello?
-Nos partidos anímannos e corríxennos algunhas accións.
-É a súa segunda tempada no Deportivo, ¿como a valora?
-Creo que bastante ben. Intento aprender o que nos ensinan.
-Ten de adestrador a José Ramón, ¿que supón estar cun xogador que foi un referente?
-Bastante ben con el. Aprendemos moito, ensínanos moitas cousas e estou aprendendo bastante aquí.
-Na liga, o equipo xuvenil do Deportivo está segundo, preto do líder, o Celta. ¿O obxectivo é o campionato?
-O que queremos é gañar a liga. Empezamos moi ben a tempada pero esta segunda volta arrancámola bastante mal, cunha mala racha. Pero agora estamos a ver se conseguimos remontar.
-Xoga de dianteiro, ¿hai algún xogador no que se fixe do Deportivo ou de fóra?
-A verdade é que non. Intento xogar o meu fútbol e nada máis.
-E se ten que definir o seu fútbol, ¿que destacaría?
-Un xogador rápido, que lle gusta facer desmarques ás costas da defensa.
-Algunha vez cando empezaba no fútbol na base do Cruces soñaba con chegar as canteiras de referencia galegas, porque estivo no Celta e agora no Deportivo...
-Si. Tiña moitas ganas xogar neste tipo de fútbol xa de nivel, nos equipos que son referencia aquí en Galicia.
-Quédalle un ano máis de xuvenil, ¿xa pensa na próxima tempada?
-Espero seguir no Depor. Pero tamén depende dos estudos porque acabo segundo de Bacherelato, pero en principio seguirei.
-Antes dicía que de pequeno soñaba con chegar a onde está, agora con 18 anos recén cumpridos, ¿cal é a meta que se marca? ¿Ascender ao primeiro equipo?
-O obxectivo é acabar este ano e a ver o que pasa o ano seguinte. Non penso nun futuro. Penso nos estudos e a ver se dou chegado, pero senón...
Roi Peiteado cruceño na base deportivista