A Udiaf de desenvolvemento infantil en Deza atendeu a máis de 150 familias o pasado ano
LALÍN
A Unidade de Desenvolvemento Infantil e Apoio Familiar (Udiaf) de Deza, con sede en Lalín, atendeu o pasado ano a 156 familias dos seis municipios da comarca. O seu grado de satisfacción global foi de 4,91 puntos sobre 5, como recolle a memoria anual de actividades do centro. Houbo 4.052 prestacións individuais, entre elas 126 consultas de acollida, 254 sesións de valoración e ata 3.255 sesións de apoio directo a menores e as súas familias.
Os deputados do grupo parlamentario do PP, Raúl Santamaría, Manuel Santos e Carmen Pomar, acompañados polo edil de Política Social de Lalín, Avelino Souto, visitaron onte as instalacións da Udiaf, onde a súa coordinadora xeral, María García, deulles a memoria anual e coñeceron o funcionamento e necesidades actuais do centro. Os deputados puxeron en valor a labor realizada nos seis concellos de Deza e amosaron o seu compromiso de trasladar as necesidades desta unidade e dos profesionais ao Parlamento de Galicia, para garantir que o servizo se preste coa mellor calidade posible. A Udiaf de Lalín abriu en 2009 e xa atendeu a máis de 850 familias.