Clausura do evento Unha aldea de Nadal no Camiño


Queridos amigos, chegou o triste momento de entonar o «pobre de min», porque toca ao seu fin a Aldea no Nadal do Camiño en Codeseda, pero facémolo coa esperanza e a firme convicción de que xa só quedan 11 meses para repetilo no vindeiro mes de decembro.

O pasado día 06 de xaneiro, puxemos o broche de ouro a 32 días ininterrompidos de alumeado multicolor con máis de 80.000 luces acendidas, (tocamos a 4000 por cada habitante do lugar), foguetes de luces, á exposición de 60 beléns artesanais feitos á man polos veciños e amigos da Casa do Patrón, múltiples conferencias sobre o Camiño de Santiago na propia aldea de Codeseda e tamén nos centros escolares interesados dos concellos do Deza polos que atravesan a nosa Comarca os Camiños da Vía da Prata e o Camiño de Inverno, así como un concurso de postais sobre a importancia do Camiño ao seu paso por estas terras.

Durante cinco domingos consecutivos e máis o festivo de Reis, realizamos representacións teatrais, actuacións musicais de todo tipo, un mercadiño solidario a cargo de entidades que coidan do colectivo da diversidade funcional na comarca e xoves emprendedores da zona, así como unha andaina por un tramo da Vía da Prata e outro da ruta homologada do Castro de Doade, que a une co formidable conxunto etnográfico de Codeseda. En definitiva, foi un acto multicultural, cheo do colorido, festa e ilusión, dos que tan necesitados estamos nos tempos actuais.

Circunstancias adversas

Unha vez máis fixémolo! E nesta ocasión non era doado: conseguimos executar a totalidade do programa inicial proposto en momentos de extrema dificultade, tanto pola súa gran complexidade, como polas circunstancias adversas provocadas pola pandemia que nos acosa. Lembremos que cando comezamos a montaxe do evento, tanto Galicia, como as principais cidades da comunidade e incluso Lalín soportaban un peche perimetral, que para nada nos animaba, pero seguimos traballando coa fe que nos caracteriza, logrando realizar a programación íntegra prevista, e ademais con gran asistencia de público, tanto nos actos programados para os fins de semana, como no resto dos días, acadando cifras globais similares ás do ano anterior, o cal aínda nos parece imposible a día de hoxe. Por outra banda, a difusión do amplo abano de actividades acadou as máis altas cotas, estando incluídas en 4 programas diferentes da TVG (Malicia noticias, A revista, Galicia noticias e o Telexornal Serán), no programa España Directo da TVE, entrevistas nas radios locais, prensa escrita e na totalidade das redes sociais.

Unha gran piña

Os veciños desta pequena gran aldea de Codeseda e dos demais dez lugares que conforman a parroquia lalinense de Doade xuntos, facendo unha gran piña, fomos capaces de derrotar e deixar atrás os nosos temores iniciais: o medo á pandemia, á chuvia, á neve, ao vento, ás xeadas.

Todos nós podemos e debemos sentirnos ben orgullosos de poñer a nosa parroquia no mapa da cultura, da tradición e do progreso, tamén polo tempo do Nadal, facendo deste humilde lugar un auténtico faro na tenebrosa costa da morte na que se atopan inmersas a maioría das aldeas galegas, na época máis fría, escura e nostálxica do ano, que, por outra banda, resulta ser a máis acolledora, na que o ser humano se parece un pouco a si mesmo, deixando por uns días de ser lobo para o seus semellantes.

O noso gran sacrificio está perfectamente resumido nunha mensaxe publicada nas redes pola concelleira de comercio de Lalín, Karen Fernández Lamela, afirmando que «esta é xente traballadora, con ilusión e humildade, isto é unha aldea no Nadal, onde os veciños están unidos por un mesmo obxectivo... Xente que une e non separa, xente que traballa por e para un pobo. Esta é a xente dunha Aldea no Nadal de Codeseda» . Moitas grazas Karen polas túas frases de ánimo!

Temos tanto que agradecer a tanta xente, que non sabemos por onde empezar. En primeiro lugar á Consellería de Turismo da Xunta de Galicia, por dar acollida a esta actividade no programa de axudas O teu Xacobeo, á Deputación de Pontevedra, pola súa achega a través do programa Pontegal, ao Concello de Lalín, pola súa estreita e permanente colaboración coa nosa entidade, ao persoal do Museo Casa do Patrón, apoiado polos veciños de Codeseda e Doade e os membros do grupo Os Trasnos, polo seu incansable traballo.

Comportamento exemplar

Tamén queremos dar as grazas ao equipo de Protección Civil, sempre disposto a axudarnos, a toda a xente que dalgún xeito aportou a súa colaboración, aos milleiros de persoas que confiaron en nós e visitaron a aldea, mantendo en todo momento un comportamento exemplar, sen ocasionar a máis mínima incidencia e respectando estritamente as ríxidas instrucións da organización e as normas de seguridade vixentes e aos medios de comunicación, polo seu incondicional apoio, sabendo valorar unha vez máis o noso xigantesco esforzo a prol de manter viva chama da ilusión e da esperanza no mundo rural galego.

Como símbolo de que isto non acabou, senón que continuará ao longo dos anos, manteremos acendido o símbolo do Xacobeo 2021, ata a vindeira edición desta festa do Nadal, a modo de facho votivo dedicado a todos os galegos, especialmente aos falecidos e doentes da COVID-19, que esperamos axiña desapareza.

Un millón grazas a todos por tanto apoio, tanto cariño e tantas bágoas derramadas xuntos no tormentoso ano 2020, que tamén xuntos pronto borraremos das nosas vidas converténdoas en sorrisos no Ano Santo 2021.

Vive Camino

Toda la información sobre el Camino de Santiago en Vive Camino

Votación
0 votos
Comentarios

Clausura do evento Unha aldea de Nadal no Camiño