A setecentos metros ao norte do que xa se coñece coma o «Parque Arqueolóxico de Moimenta», que localizamos meses atrás e que na actualidade e obxecto de estudo e catalogación por parte da Dirección Xeral do Patrimonio Cultural da Xunta, atopamos unha nova estación rupestre no Monte do Castelo da parroquia de Cadrón (Lalín) que, dada a súa proximidade e semellanza dos gravados coas anteriores, ben podería formar parte deste importante enclave arqueolóxico que agarda a súa posta en valor.
A estación rupestre atopase a media ladeira ao norte do chamado Coto do Castelo (572 metros de altitude), nun penedal que milagrosamente quedou fora da explotación dunha grande canteira que arrasou as inmediacións aínda que presenta claras pegadas de ter sido mutilada con barrenos e maquinaria. Os gravados poden verse en catro rochas aínda que non descartamos a existencia de mais xa que o mato e os liques cobren boa parte deste outeiro rochoso.
Na nosa opinión nesta estación rupestre no Monte Castelo mestúranse os gravados prehistóricos con outros mais recentes de tempos xa históricos e mesmo algún cruciforme repicado, semella de tempos relativamente recentes.
