A Estrada entrega o premio Manuel García Barros a Alberto Lema

DAVID COFÁN A ESTRADA / LA VOZ

A ESTRADA

«Pazo de inverno» foi a novela premiada nesta edición do certame

10 dic 2021 . Actualizado a las 21:38 h.

A Estrada volveu ser a capital literaria de Galicia coa entrega dun dos galardóns máis destacados neste ámbito, o premio Manuel García Barros, que na súa XXIII edición foi para o escritor de Vimianzo, Alberto Lema, pola súa obra «Pazo de inverno». Neste acto, feito por segundo ano consecutivo lonxe do Teatro Principal a causa da pandemia, participaron o concelleiro de Cultura, Juan Constenla, o director da editorial Galaxia, Francisco Castro, o secretario do xurado, Carlos Loureiro e como non podía ser doutro xeito o gañador, Alberto Lema.

O autor coruñés amosou o seu agradecemento ao Concello «polos moitos anos de promoción da lingua galega pola vía dos feitos» e «pola súa labor na defensa da nosa lingua», afirmou. Do mesmo xeito, eloxiou a figura de García Barros sinalando que foi «unha persoa indómita. Un xornalista de raza encadeado pola súa labor». Neste senso, Lema afirmou «espero que este libro sexa un digno continuador da súa tradición dunha literatura como denuncia, como revelación e na procura da verdade».

Tamén salientou o seu compromiso coa lingua. «Non deixa de ser un dos poucos escritores da súa xeración monolingües en galego. Vai moito máis alá dun máis dentro dun repertorio de ideas, senón que hai unha parte central inamovible», manifestou o premiado.

Francisco Castro dirixiu unhas agarimosas verbas sobre este certame. «Cando vemos a nómina dos gañadores, serve para facer unha certa historia da literatura galega contemporánea. Non hai outro Concello en Galicia que faga tantos esforzos e invista tantos cartos na literatura galega», destacou.

Sobre a obra, Castro apuntou que esta faríalle «especial ilusión» a García Barros. «É unha novela cun marcado carácter político no sentido máis grego da palabra, na intervención da sociedade. É o pretexto perfecto para falar de todas as cousas que condicionan a nosa democracia. Como lector fascinoume», indicou.

Exposición sobre a vida e obra de «Ken Keirades» para o 2022

Neste acto deuse a coñecer unha das novas máis esperadas no eido cultural estradense, adiantando algunha das actividades programadas para a conmemoración no 2022 do cincuenta aniversario do falecemento de Manuel García Barros, Ken Keirades.

Francisco Castro, director de Galaxia, sinalou que neste ano próximo «imos ter coa colaboración do Concello da Estrada e coa secretaría de Política Lingüística, unha exposición destinada aos veciños e escolares arredor da figura, vida e obra de García Barros». Un adianto que completou co concelleiro de Cultura, Juan Constenla, apuntando que haberá outros eventos extraordinarios con motivo desde aniversario.

No que atinxe a esta exposición sobre a vida e obra do escritor e xornalista da parroquia estradense de Callobre, explicou que ou ben a principios de ano ou na primavera, faranse pública estas distintas iniciativas para renderlle un merecido tributo a este ilustre veciño da Estrada e ao seu legado.