Profesionais da medicina e das emerxencias da Estrada lembran a Rosalía

Silleda colga mañá un obradoiro virtual e proxectará textos


a estrada / la voz

O Concello estradense colgará mañá día 24 ao mediodía na súa canle de YouTube e nas redes sociais o vídeo co que todos os anos homenaxea a Rosalía de Castro. O concelleiro de Cultura, Juan Constenla, sinalou que por mor do covid-19 cancelouse o acto institucional que acompañaba esta presentación e no que unha representación de escolares estradenses, acompañados por xente da cultura, recitaban poemas da autora padronesa.

Malia todo, o Concello réndelle homenaxe con este vídeo institucional filmado polo realizador estradense Lucas Terceiro, e gravado por veciños pertencentes ao ámbito da medicina e das emerxencias sanitarias. A escolla, realizada entre un amplo abano de profesionais «que protagonizou, con grande valentía, a loita contra a pandemia, quere poñer en valor a heroicidade de dous baluartes da nosa historia pasada e presente: Rosalía de Castro e o noso sistema sanitario», indicou Constenla. O lema da proposta é Mais ti vas indo, e incide na capacidade de resistencia e resiliencia que escritora e profesionais sanitarios amosaron e amosan fronte as moitas adversidades que lles tocou vivir.

O vídeo quedará ubicado na canle de YouTube dende mañá, xunto aos cinco anteriores que superan os 20.000 visionados. Constenla agradeceu a participación de todos os profesionais sanitarios que colaboran no vídeo, do Centro de Saúde estradense, Emerxencias A Estrada e 061. Tamén da Fundación Sondeseu, que achegou os fragmentos musicais que enmarcan este traballo.

Pola súa banda, o Concello de Silleda organiza un obradoiro virtual para as familias coa obra de Rosalía como protagonista. Dirixido por Barafunda, poderá seguirse dende mañá e ata finais de marzo na web municipal. A través do enlace que alí se situará, os participantes recibirán as instrucións para seguir esta actividade. Precísanse un folio, pincel, rotulador, tesoiras, pau de madeira, ceras e cinta adhesiva, entre outros materiais, para confeccionar unha rosa de papel na que se poderán ler versos de Rosalía de Castro. A iniciativa súmase á proxección de textos da autora na noite de mañá, na fachada da Casa da Cultura ?praza Siñor Afranio?, unha actividade que chega da man da Deputación de Pontevedra.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Tags
Comentarios

Profesionais da medicina e das emerxencias da Estrada lembran a Rosalía