Dávila reivindica na Estrada o papel das mulleres novelistas

López anuncia un novo premio literario para narrativa infantil


Berta Dávila (Santiago, 1987) reivindicou o papel das mulleres novelistas ao recoller no teatro Principal da Estrada o premio Manuel García Barros, que acadou coa súa obra Carrusel. Un libro, dixo, que fala de sutís casualidades entre os números, esas como as que a fan gañadora da trixésimo primeira edición do certame aos 31 anos. Rescatou outro número para suliñar que nestas 31 edicións soamente catro mulleres figuran entre os gañadores: «Son feliz de sumar o meu nome ao delas. E quero deixar un aviso: as mulleres que escribimos novelas estamos aquí. Chegamos para quedar. Asuman que queremos ser novelistas, señores, e non só obxectos das súas novelas». O secretario xeral de Política Lingüística, Valentín García, apuntou o papel destacado das escritoras na literatura galega actual, «algo que queda patente nos premios García Barros, que premiaron a unha muller o ano pasado e a outra neste».

Dávila lembrou unha pasaxe dun dos seus libros no que sostén que «a verdadeira vocación do escritor será sempre a soidade». Engadiu que cando un libro ve o papel cómpre falar dos que o acompañan, e dou as grazas «a tres homes de ben que teñen moito que ver en que este libro sexa hoxe de papel». Tres Carlos: o tío Carlos, personaxe da novela; o editor Carlos Lema; e Carlos Meixide, «que significa a fortuna de compartir a vida e os libros con amor e humor, pero sobre todo, cun amigo». Rematou sinalando: «Agardo que tamén con amor fagan xirar vostedes este Carrusel, que sexan indulxentes con el e que o seu vaivén faga que algo, por pequeniño que sexa, se lles mova dentro».

O alcalde da Estrada, López Campos, fixo un anuncio de calado no acto: o Concello da Estrada sumará o vindeiro ano un novo premio literario, de narrativa dirixida ao público infantil, que completará o Manuel García Barros de novela e o Avelina Valladares de poesía.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Tags
Comentarios

Dávila reivindica na Estrada o papel das mulleres novelistas