Os traballos literarios de 61 rapaces da vila premiaranse nunha gala coa escritora Ledicia Costas como madriña e coa música de Decotío
30 may 2019 . Actualizado a las 05:00 h.A Estrada acollerá o martes da vindeira semana, día 4 de xuño, a sexta edición da Festa das Palabras. Será a partir das 20.00 horas no Teatro Principal. A gala contará coa escritora Ledicia Costas como madriña literaria e será a posta de largo dun total de 61 escritores novos. Son os gañadores do VI Concurso de Micropoemas e Microrrelatos organizado polos equipos de dinamización lingüística de todos os centros de ensino da Estrada.
Os alumnos poderán ver publicadas as súas obras nun volume conxunto que lles será entregado coma agasallo na Festa das Palabras. Ademais dos micropoemas e os microrrelatos gañadores, o volume inclúe catorce debuxos feitos por nenos de educación Infantil dos colexios da zona. Debuxos e textos xiran en torno a dúas palabras escollidas entre os títulos das obras de Antonio Fraguas, o autor ao que este ano se lle dedicou o Día das Letras Galegas. A palabra «lenda» inspirou os microrrelatos e a palabra «serán» foi o xerme dos micropoemas. As dúas foron tamén a base sobre a que traballou a deseñadora Rosa de Cabanas para ilustrar a portada do volume que o martes recollerán todos os premiados nun acto no que ademais recibirán un caravel branco.
Ledicia Costas, unha das máis destacadas escritoras galegas de literatura infantil e xuvenil do panorama actual, será a madriña da nova promoción de escritores mozos nun acto festivo no que tampouco se esquecerá a música. Poñerana Decotío Gaiteiros, unha agrupación de música tradicional formada por músicos estradenses de todas as idades.
A Festa das Palabras foi presentada onte polos equipos de dinamización da lingua galega de todos os centros estradenses, que destacaron os obxectivos da iniciativa: promover o uso da lingua galega e prestixiar a lingua, desterrando prexuízos e promovendo actitudes saudables cara o galego. Trátase ademais dunha das poucas actividades nas que se implican cóbado a cóbado todos os centros locais.