O García Barros con raíz máis local dos últimos tempos

As terras de Deza e A Estrada teñen presenza na novela da silledense Ana Cabaleiro

.

a estrada / la voz

A trixésima edición do premio de novela Manuel García Barros ten dobre raíz dezá. A súa autora é a xornalista e escritora Ana Cabaleiro López (Saídres, 1974). E os espazos onde sitúa a acción están na súa Silleda natal e tamén na Estrada, nos desprazamentos da protagonista da obra cara a Santiago. O xurado fallou onte o galardón, dotado con 9.000 euros e a publicación da obra pola editorial Galaxia, que convoca o Concello estradense coa colaboración da Xunta a través da Secretaría Xeral de Política Lingüística. Estivo integrado pola filóloga e ensaísta María Eulalia Agrelo; a poeta e xornalista Olalla Cociña; o poeta e editor Carlos González de Lema; o escritor e crítico literario Armando Requeixo; e como secretario o mestre e escritor Carlos Loureiro. O fallo foi por unanimidade entre as dezanove obras presentadas.

O xurado destacou que foi o primeiro premio importante para Ana Cabaleiro coa súa primeira novela tras publicar o libro de contos De sapos e sereas. Presentou o seu traballo baixo o lema Coralia Fandiño e co título As Ramonas. Converteuse na terceira muller que gaña o García Barros nas trinta edicións xa convocadas. Armando Requeixo destacou a reivindicación que fai a autora do papel da muller no mundo actual e a súa querenza polos veciños da zona, ao ser Saídres o epicentro da novela e tamén o lugar onde naceu Ana Cabaleiro.

González de Lema desvelou a liña argumental da obra premiada, a historia dunha fotógrafa de vodas que ansía trascender e alcanzar a liberdade a través da arte. O fondo da mesma é un tema universal, o intento dunha persoa da aldea cun traballo normal mediante o cal pretende trascender a súa realidade cotidiá.

Chamou a atención do xurado, como explicou González de Lema, que toda a acción transcorre nos interiores de coches xa que a protagonista quedou sen o carné de conducir, pero sen buscar «un falso efectismo» senón como canle da novela. Mentras, María Eulalia Agrelo destacou o «papel protagónico fundamental» das mulleres, de todas as idades e que buscan gañar o futuro. Loubou a introducción no mundo feminino e rural pero tamén afectado polas novas tecnoloxías. Incidiu tamén que o título da obra, «moderna, atractiva, sedutora», responde ao nome das protagonistas do relato.

Olalla Cociña admitiu que lle chamou a atención da historia a construcción do personaxe principal, unha especie de antiheroína, unha perdedora que vai crecendo ao longo da novela ata chegar a ser unha gañadora na vida. Requeixo tamén alabou a inclusión dunhas «personaxes femininas fascinantes e que representa a vitoria do mundo da arte fronte as continxencias cotidiás».

A gañadora, Ana Cabaleiro, recibiu a noticia da concesión do galardón nunha chamada do alcalde estradense, José López. O seu primer destino como xornalista, tras estudar Xornalismo na USC, foi precisamente na emisora local Radio Estrada e na actualidade traballa no gabinete de prensa da Deputación de Pontevedra. A súa ópera prima, De sapos e sereas, contos tamén en clave feminina, tivo unha boa aceptación do público.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Comentarios

O García Barros con raíz máis local dos últimos tempos