Destacan na Estrada que o galego segue no olvido no mundo xudicial

Onte tivo lugar unha homenaxe ao xuíz Fernando Fernández Leiceaga

.

a estrada / la voz

Queda moito camiño por percorrer e o galego goza de escaso protagonismo se falamos do seu uso na xustiza. Pode ser a conclusión tras o acto celebrado onte no consistorio da Estrada, que promoveu a Irmandade Xurídica Galega para render homenaxe aos xuíces que desempeñan a súa labor en galego, aproveitando a celebración de 35 aniversario da Lei de Normalización Lingüística e baixo o lema Lingua de Lei. No caso estradense, o tributo foi para Fernando Fernández Leiceaga, quen a comezos dos anos noventa ditou as primeiras e únicas sentenzas en galego na vila.

O salón de plenos acolleu as intervencións nun acto que contou coa presenza dos alcaldes da Estrada, Forcarei e Cerdedo-Cotobade, xunto ao director xeral de Política Lingüística, Valentín García. Tamén estiveron entre os asistentes representantes da corporación estradense e Xoaquín Fernández Leiceaga, portavoz do PSOE no Parlamento de Galicia e irmán do homenaxeado. Non faltaron avogados e outros representantes do mundo xudicial local.

O presidente da Irmandade Xurídica Galega, Xoaquín Monteagudo, foi o encargado de presentar o acto lembrando a creación da entidade e os seus obxectivos para potenciar o uso xurídico do galego e o exercicio de memoria de quenes defenderon no seu día o emprego da lingua no seu ámbito profesional, dende xuíces a maxistrados ou avogados. Citou otras vilas e cidades onde xa fixeron homenaxes similares ao que recibiu Fernando Fernández Leiceaga, na actualidade maxistrado do TSXG. Tamén a Irmandade, apuntou, fai unha labor pedagóxica dentro da comunidade xurídica para buscar adhesións á tarefa da defensa da lingua.

Os avogados estradenses Xesús Palmou, Mónica Arca e Iván Sanmartín tamén interviron. O primeiro para recordar que compartiu estrado con Fernández Leiceaga e destacar o seu compromiso co galego, facilitando no Xulgado o seu emprego polos veciños nas súas testemuñas e respostas. Pola súa parte, Mónica Arca apelou á posta en marcha de máis recursos para potenciar a implantación da lingua no sistema xudicial, que non está pensado para o galego, apelando a un esforzo colectivo. Na mesma liña pronunciouse Sanmartín.

Fernando Fernández Leiceaga asegurou non ser merecedor de ningún tipo de homenaxe, lamentando que os novos compañeiros despois non fixeran o esforzo de adaptarse á realidade social da Estrada. Pola súa banda, Valentín García recoñecía que é menos fácil a implantación do uso do galego na xudicatura, fronte ás administracions locais ou mesmo á sanidade. Lembrou os distintos programas e ferramentas que a Xunta ten a disposición dos interesados, como Lexgal, con toda a lexislación en lingua galega. Citou tamén a sentenza do Prestige, de ámbito internacional e ditada en galego.

Os tres alcaldes presentes no acto asinaron unha declaración xunto a Irmandade Xurídica Galega co seu compromiso a prol do emprego do galego no ámbito xurídico e contractual nos concellos. O rexedor estradense, José López, apelou á proximidade da Administración aos veciños, apuntando que o seu municipio foi pioneiro en contar con servizo de normalización lingüística e cos premios San Martiño. O descubrimento dunha praca conmemorativa da homenaxe a Fernández Leiceaga, na pranta baixa do consistorio, no seu día sede xudicial, pechou o emotivo acto onte na Estrada.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Comentarios

Destacan na Estrada que o galego segue no olvido no mundo xudicial