O Concello entregará trampas e repetirá o concurso parroquial
02 may 2022 . Actualizado a las 20:25 h.Capturar raíñas de velutinas é o obxectivo da posta en marcha dunha nova campaña de trampeo que pon en marcha o Concello de Lalín, e que arrancará oficialmente esta mesma semana coa distribución de trampas polas distintas parroquias.
O concello comezou a remitir onte mesmo aos pedáneos carteis informativos para que sexan colocados en todas as parroquias do municipio, e nos que se dá conta da posta en marcha da iniciativa un ano máis. «Os resultados son os que avalan campañas como esta e din que se conseguiron capturar centos de raíñas. Iso significou a elaboración de moitos menos niños grazas ao trampeo e moitas menos obreiras que traballaron», significou o concelleiro de Agricultura Avelino Souto.
A entrega de trampas nas aldeas materializarase a finais desta semana, según anunciou Souto, e irán destinadas preferentemente a aqueles veciños que non posúan ningunha. «Estas cincocentas unidades son para os que non teñan trampas preferiblemente, e que se comprometan a atendelas para que funcione o trampeo encamiñado a controlar e poder erradicar a presenza de vespas velutinas no municipio». As persoas que acoden a recoller as trampas aos puntos de cada unha das parroquias, que se anuncia nos carteis informativos, recibirán tamén información sobre a colocación das mesmas. «Cada trampa leva un díptico informativo explicando a mestura que ten que levar a trampa para atraer as velutinas, onde é convinte colocala e tamén a limpeza da mesma». O concelleiro desprazarase ás parroquias acompañado polos expertos abelleiros Jorge Peña e David Liñares que se encargarán de dar as explicacións oportunas aos veciños sobre a captura de velutinas.
Por outra parte a campaña deste ano volve contemplar a celebración do Gran Prix da Velutina, unha competición entre parroquias na que se premiará ás que logren atrapar máis. «É unha competición xa entre as parroquias do municipio que lle gustou moito á xente, e que me gustaría propiciar con outras iniciativas ao igual que se está facendo por exemplo coa ximnasia terapéutica no rural, e entón se algo funciona ben pois nada mellor que mantelo», sentencia Souto. Así o concurso de capturas de vespas velutinas, para o que se teñen que anotar as parroquias interesadas en participar, abrirase o próximo día 9 de maio e terá continuidade ata o día 30 deste mes. Posteriormente farase o reconto de capturas e haberá premios para as tres mellores parroquias. No pasado exercicio tomaron parte no concurso do Gran Prix da Velutina un total de 10 parroquias lalinenses, e resultaron gañadoras as de Soutolongo, Vilatuxe e Noceda ao lograr capturar o maior número destes insectos. A pasada campaña de trampeo pechouse con 5.200 exemplares de velutinas atrapadas entre a decena de parroquias participantes na actividade.