A violencia de xénero, violencia exercida sobre as mulleres polo mero feito de selo, é unha das
violacións dos dereitos humanos máis graves e sen embargo, unha das máis toleradas en todo
o mundo. Traspasa fronteiras, culturas, etnias, idades e niveis socioeconómicos.
Estamos nun momento, nesta situación de estado de alarma, no que ás dificultades propias
que provocan situación de maior vulnerabilidade nas mulleres, temos que engadir outras novas,
coma o longo tempo de illamento nos fogares, a maior carga de coidado de menores, per -
soas enfermas e persoas dependentes, o incremento das situacións de precariedade laboral e
económica que historicamente padecen as mulleres, e o peche ou o difícil funcionamento de
moitos servizos.
A pesar do amplo marco normativo e dos recursos existentes para tratar de previr e combater
as violencias patriarcais, a violencia machista segue sendo un fenómeno en plena expansión,
tal e como indican diversos informes autorizados e como podemos ver cada día nos medios de
comunicación. Lonxe de desaparecer, adquire novas formas e alcanza novos grupos de idade. É
especialmente preocupante e significativo o aumento da violencia de xénero entre a poboación
adolescente, así como a naturalización desta e a falla de resposta e de reacción ante a mesma.
A presenza continuada de actos de violencia e asasinatos de mulleres, constitúe un dos indicadores
máis claros de desequilibrio e desigualdade da nosa sociedade.
Cada ano en España, 600.000 mulleres son maltratadas e unha media de 60 mulleres son asasinadas
vítimas da violencia de xénero.
Segundo datos oficiais, en 2020 foron asasinadas en España 41 mulleres (2 delas en Galicia) e 3
menores vítimas da violencia de xénero e quedaron orfas e orfos 23 menores.
A crueza destes datos, a pesar de ser terribles e irreparables, supoñen soamente a punta do
iceberg desta grave problemática, que se sustenta noutras formas de violencia menos visibles,
pero non por elo menos importantes e sobre as que é necesario actuar, como os insultos, as
descalificacións, a cosificación, a violencia económica, o acoso na rúa, o acoso laboral, os abusos
sexuais, as violacións, a prostitución, a trata, os ventres de alugueiro..., nos que as vítimas
sempre son elas e os agresores sempre son eles.
Nesta situación, dende as Concellerías de Igualdade e Muller do Concello de Lalín, queremos
informar a todas as mulleres que poidan estar sufrindo violencia de xénero que neste difícil
momento de crise e incertidume, como marca a lei, os recursos e accións de prevención e resposta
continúan en marcha, especialmente cando se trata de situacións de emerxencia.
1
Os investimentos públicos e os recursos profesionais son imprescindibles para previr e combater
esta terrible lacra.
As violencias machistas desaparecerán cando as mulleres participen plenamente e de forma
igualitaria na sociedade, cando deixen de estar á cabeza das cifras de pobreza, das listas de desemprego,
dos traballos precarios, dos problemas de conciliación da vida persoal, familiar e laboral,
cando se deixe de usar a súa imaxe como obxecto de consumo e cando se deixe de
mercantilizar cos seus corpos, cando sexan nomeadas, recoñecidas e visibilizadas en todos os
eidos sociais.
Desde o Concello de Lalín queremos manifestar o noso rexeitamento cara aquelas actitudes
que impiden avanzar na consecución dunha igualdade real e facemos un chamamento á sociedade
para que se conciencie, se mobilice e se comprometa a conseguir unha sociedade libre
de violencias machistas. Podemos cambiar a realidade actual, debe ser un reto e unha
responsabilidade compartida cara a erradicación desta gran pandemia social.
PROTEXÁMONOS TAMÉN CONTRA A PANDEMIA DO MACHISMO
VACÍNATE EN IGUALDADE
#LALÍNSENVIOLENCIA
#CONTRAASVIOLENCIAS MACHISTASLalí