Agradecemento a Lara Rodríguez


Hoxe é un día triste para nós. Despois de catro anos dun goberno que, con máis acertos que erros, foi capaz de amosar o camiño cara unha xestión democrática, os vellos tempos asoman de novo.

Destes catro anos de aire fresco, queremos destacar a figura dunha muller imprescindible, Lara Rodríguez Peña.

Como concelleira de Cultura e cun orzamento moi limitado, conseguiu achegar a Lalín, capital do inmobilismo cultural institucional, unha programación variada e transformadora, dándolle protagonismo á creación local e aos espazos comunitarios, a carón do tecido asociativo.

O seu traballo non se limitou á xestión. Ademáis das tarefas asociadas á concellería, actuou como técnica, administrativa, cando non directamente como man de obra. Non dubidou en transportar e colocar sillas para os concertos das bandas, abrindo e pechando espazos en fin de semana, ou participando directamente no traslado da vella á nova biblioteca, ... Traballo e tempo desinteresado e impagable que fixo lonxe da búsqueda de calquera rédito persoal e mediático.

Conciliar presión e discreción

Dentro do goberno tivo que traballar sempre conciliando o facer presión dende dentro coa mesura e discreción cara a fóra, ante uns medios sempre dispostos a presentala como elemento desestabilizador do goberno cando xurdían necesarias e saudables discrepancias.

Lara é ademáis a primeira muller candidata á alcaldía na historia de Lalín. Aínda que na superficie calquera tempo pasado puidera ser peor, e a pesares da capacidade, solvencia e intelixencia demostrada, ser muller, nova e dilixente puideron ser de novo un lastre insalvable. A xente non viu a gran alcaldesa que vemos nós. Debemos asumir a crítica e loitar por mellorar para que isto cambie.

Como compañeiras de viaxe, por dar voz, poñer a cara e sufrir e padecer na túa persoa as reaccións de accións e decisións que pertencían á Plataforma, estarémosche sempre agradecidas.

Por todo o feito e por todo o que loitaches: Grazas, Lara!

Hoxe Lalín perde un pouco de luz.

Compañeiras e compañeiros da PAC.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
1 votos
Comentarios

Agradecemento a Lara Rodríguez