O artista silledense fíxose co primeiro premio do concurso, convocado pola Xunta, coa pintura «En prácticas»
22 nov 2018 . Actualizado a las 05:00 h.O Concurso Xuventude Crea, organizado pola Xunta de Galicia, otorgou o primeiro premio ao artista silledense Adrián Penido Núñez. Un xove creador que combina actualmente a aprendizaxe de traballar con coiro coa pintura e a escultura.
-O de ser creativo vénlle de cativo?
-Pois non, fun algo tardío e foi na adolescencia. Xurdiu dun xeito un pouco estraño a través do cómic. Fun interesándome pola ilustración e estudei un ciclo superior de ilustración en Ourense para logo facer Belas Artes.
-Era a súa primeira incursión no Xuventude Crea?
-Xa me presentara nas anteriores convocatorias con esculturas e o ano pasado acadei un terceiro premio compartido.
-Máis sorte nesta edición cun primeiro premio, foi cunha pintura?
-Si. Chámase «En prácticas». É un autorretrato e fago un pouco unha crítica social a este mundo artístico e ás dificultades que temos para saír adiante, é unha reflexión sobre o futuro laboral do artista. Este é un concurso, ten unha dotación económica pero é algo pasaxeiro, non temos a que agarrarnos para manter unha estabilidade. O cadro invita a refexionar sobre o tema e a cada persoa lle evocará certas sensacións ou ideas. Interésame que non quede en algo pechado senón aberto precisamente a opinións.
-Que significa este recoñecemento?
-Os concursos teñen unha parte moi positiva ao teren difusión e dotación económica que axuda pero tamén unha parte negativa que son as inseguridades que vives ao presentarte e non saber se vai gustar a túa creación, incluso pode supoñer modificar a túa propia forma de crear.
-En proxecto?
-Seguir aprendendo. Un artista sempre o está facendo.