«Esperabamos promoción, pero non chegar a canción do verán»

O seu tema«Ei xabarín» foi elixido coma o mellor galego da tempada


a estrada / la voz

O tema Ei xabarín, incluído no disco Porcocán, o último traballo do grupo estradense Esquíos, vén de ser elixido a canción do verán en Galicia. O título concédello o concurso Vas sacar nota, promovido pola Radio Galega. Neste espacio radiofónico elíxense cada ano os dous temas do verán galego: un votado por un xurado profesional e outro polo público. Esta vez o xurado quedouse co tema do grupo estradense, que en xuño tivo que suspender a xira de presentación do seu disco pola morte repentina do seu vocalista, Miguel Castro, Moro.

-Supoño que é unha boa homenaxe a Miguel Castro...

-Está claro. Ogallá el puidera velo. El formou parte dese disco e é o cantante... Cando nos deron a noticia e nos chamaron da Radio Galega, Jorge [en alusión ó guitarrista do grupo, Jorge Rodríguez] emocionouse en antena ...

-¿Víanse coma autores da canción do verán?

-Foi bastante sorpresa. Participabamos todos os anos, pero non contabamos con gañar. A intención era darnos a coñecer, que a xente nos escoitase. Esperabamos promoción, pero non chegar a canción do verán.

-Para quen non o escoitara, ¿de que vai o tema?

-É un tema de música rock, bailable e cun estribillo pegadizo. A letra é de Jorge Rodríguez e vai con doble sentido, cada un pode interpretala como queira. É das cancións do novo disco que máis lle gustan á xente.

-O disco está dispoñible en descarga directa e gratuita ¿por que?

-Non tiñamos pensado poñelo en descarga directa nin de broma, por moitas razóns. Nun principio, a descarga costaba 5 euros. Non era caro. Pero despois do de Miguel quixemos que ese traballo conxunto chegara ó máximo de xente posible, que o escoitara todo cristo...

-¿Cómo se recompón a banda?

-O primeiro ensaio foi moi estrano. Estabamos os tres solos [o batería, o guitarrista e o baixista, Pedro Dono] porque quedaramos para ver se seguiamos co grupo ou non. No local temos fotos e sempre se che vai a vista a mirar para Miguel... Tocamos uns temas, pero era unha especie de querer e non poder.

-E ó final decidiron seguir...

-Hai que tirar para diante. Temos que volver a empezar casi de cero. So imos quedar os dous Jorges. O baixo vai marchar a Madrid e vai entrar Xosé Maceira, que antes tocaba con Nao. Temos tamén uno novo cantante, Adrián Gañete, Patuco, e un guitarra novo, Manuel Rodríguez. Levamos cinco ou seis ensaios pero a cousa ten boa pinta. Estamos con máis ganas ca nunca.

-Ademáis do concerto-homenaxe a Miguel Castro na Estrada do 7 de setembro, ¿que outros proxectos teñen na cabeza?

-Ó gañar o concurso creo que temos varios concertos de pago e algunhas horas de estudio para grabar. O primeiro vai ser tentar recuperar a xira de presentación de Porcocán, que está recén saído. No futuro seguramente tentaremos grabar outro disco.

entrevista jorge iglesias, batería do grupo estradense esquíos

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
1 votos

«Esperabamos promoción, pero non chegar a canción do verán»