O vindeiro sábado arranca o Campionato Galego de Ralis coa disputa da proba da Ulloa. Logo de meses sen competir, Bamarti está listo para ir a polo título
17 feb 2010 . Actualizado a las 02:00 h.O Campionato galego de Ralis bota a andar o vindeiro sábado no Rali da Ulloa. Co reloxo baixando, o piloto de Cuntis afincado en A Estrada José Miguel Martínez Barreiro, Bamarti, conta as horas para volver a competir no autonómico. Pasaron arredor de nove meses dende que os problemas de motor do seu Peugeot 306 Kit Car o obrigar a abandonar a tempada pasada; ese tempo en dique seco non fixo máis ca aumentar as ganas de correr do bicampión galego. Hai máis ganas ca nunca.
-En pouco máis de 72 horas estará de novo ao volante, e competindo. ¿Todo listo?
-Pois si, ao coche fáltanlle algúns detalles de última hora, pero son retoques. Os entrenos foron ben porque levabamos tempo sen correr e faltaba un pouquiño de soltura á hora de coller as notas, pero isto é como montar en bici, nunca se esquece.
-¿Que sensación percorren a un piloto na antesala de comezar un campionato?
-Sobre todo o que temos é a forza e a ilusión da xente que te sigue e dos patrocinadores. Sentes a responsabilidade de facelo ben por eles; física e mentalmente chegamos ben ao inicio do campionato, e agora xa estamos desexando que empece.
-¿Hai fame de carreiras?
-Si, claro, e máis no noso caso, que levamos moito tempo sen correr. Durante os entrenos matamos un pouquiño o gusanillo, pero a hora da verdade será o próximo sábado. Ata que pasan dous ou tres tramos non podes comprobar como te atopas.
-O Rali da Ulloa é o primeiro de nove probas que decidirán o título autonómico. ¿O obxectivo é a coroa galega?
-Nós queremos pelexar pola vitoria. Non podemos plantexarnos máis que ir a polo título. Os dous últimos anos, que abandonamos, fixémolo cando iamos líderes, e os dous anteriores gañamos. Non imos saír a participar só, senón tamén a gañar, despois xa será a competición a que nos diga se é posible ou se non. Nós imos a pola vitoria, e logo, xa se verá.
-Atendendo á competición, e aos rivais. ¿Como ve o campionato esta tempada?
-Nós queremos pelexar pola vitoria, pero hai xente que corre case todas as fins de semana, como poden ser Burgo ou Neira, e ti non sabes como estás ata o Rali.
-Levar tanto tempo sen competir, ¿pasará factura?
-No meu caso cando chegas á metade da tempada está claro que todo vai moito mellor; agora todo é máis complicado e lévache máis tempo coller as notas, pero é coller o ritmo.
-Volvendo ao campionato, e aínda que é moi cedo, ¿ve o nivel de competitividade doutros anos?
-Véxoo moi competitivo. Este ano hai sobre 16 Mitsubishis inscritos xa para a Ulloa. Son coches novos que non sabes como van ir de ritmo. Hai un Súper 2000 que tamén pode ir moi forte; Alberto Meira parte con coche novo... Burgo é a quen temos no punto de mira, xa que é o vixente campión, pero para min son todos rivais. Calquera que vaia por diante, é rival.
-¿Podemos falar entón de que a crise pasa de longo no autonómico?
-Eu estou moi sorprendido. A inscrición para o Rali da Ulloa é de 108 pilotos; parece que hai máis coches ca nunca, e ademais é unha inscrición de súper luxo.
-A paixón polo motor semella intacta nos seareiros galegos.
-Semella que hai máis afición ca nunca, tanto en seguidores como en participantes, e iso fai o campionato máis aberto ca nunca. O automobilismo calquera diría que é alleo ao que pasa no mundo.