Freixanes alude ó García Barros como pilar indispensable da novela galega

DEZA

Xosé Monteagudo recolleu onte o premio estradense de novela longa pola obra «Un tipo listo», a historia dun respetado director de banco que comete un desfalco

12 dic 2009 . Actualizado a las 02:00 h.

A Estrada convertiuse onte en «capital das letras galegas» coa celebración da entrega do premio de novela longa Manuel García Barros nun acto no que non faltaron voces de ánimo para os organizadores do certame nin intervencións espontáneas rachando co protocolo.

O acto, presentado por Valentín García, abriuse cunha intervención musical. A Coral polifónica de Berres non quixo deixar pasar a ocasión de festexar a entrega do premio que leva o nome do máis sonado veciño da parroquia. Un sobriño e dous bisobriños de Manuel García Barros forman parte da agrupación musical, dirixida por Diego Neira.

Despois do aperitivo musical, as autoridades tomaron o escenario para agasallar ó premiado da vixésimo primeira edición do certame literario, Xosé Monteagudo Folgar. O presidente da editorial Galaxia, Víctor Freixanes, fíxolle entrega simbólica da primeira novela gañadora do García Barros editada polo selo galego. Coa súa retórica envolvente, Freixanes felicitou ó gañador e destacou o importante papel que xoga o premio de novela Manuel García Barros. «O Blanco Amor, o Xerais e o García Barros son os tres ríos caudalosos que constrúen a novela galega contemporánea», sinalou. «É imposible entender a novela galega contemporánea sin o premio García Barros», sinalou antes de citar algúns dos gañadores das edicións previas convertidos hoxe en autores consolidados, como Queipo, Agrafoxo, Caneiro, Aníbal Malvar ou Jaureguízar.

Iniciativas mantidas

Como representante da editorial Galaxia, que leva dez anos editando as novelas premiadas, Freixanes loubou a perseverancia do Concello estradense. «O difícil non é crear as iniciativas, é mantelas cando todo o mundo as da por feitas», indicou.

O relevo na palabra tomoullo o secretario xeral de Política Lingüística, Anxo Lorenzo, que destacou a literatura como unha importante canle para levar a cabo a promoción do uso do galego. Lorenzo considerou a literatura como «unha ferramenta valiosa para conseguir que o idioma propio de Galicia chegue a todos os galegos e as galegas» e destacou o certame estradense como exemplo de impulso á lingua e de alento «a persoas con vontade de contar historias e de fomentar a reflexión a través do galego».

O último en intervir foi o alcalde estradense, Xosé Antonio Dono, que fixo pública a intención do Concello de mellorar o certame «ano a ano».