O campión olímpico da clase Tornado en Pekín 2008, o vilagarcián Antón Paz, dirixe desde hoxe e ata o sábado a primeira edición do Clínic Sigaltec da clase Optimist que organiza o Liceo Casino de Vilagarcía.
O alumnado está composto por 40 regatistas da Coruña, de Sanxenxo e de Cangas, pero tamén procedentes de Madrid e do País Vasco, aproveitando as facilidades que dá a celebración nunhas datas como as do Nadal.
Os participantes traballarán divididos en catro grupos en función do nivel dos regatistas, que recibirán formación técnica, táctica, de velocidade e de manobrabilidade. Antón Paz impartirálles dúas charlas, unha sobre a optimización da posta a punto do barco, e outra arredor das claves do éxito na vela.
Como colofón ao clínic, o Liceo programou o derradeiro día, o sábado, unha regata de competición entre os seus 40 alumnos que finalizará coa correspondente entrega de premios. Ese mesmo día, pola noite, a sección de vela do club e os seus familiares disfrutarán da súa cea anual.