A obra de Ibuprofeno, con 11 candidaturas, terá os seus maiores rivais en «A serie clopen», do Centro Dramático Galego, con 10, e «TROMSØ», de Morraoconto, con 7
04 mar 2026 . Actualizado a las 23:04 h.A montaxe teatral producida por Ibuprofeno Reconversión álzase como favorita para a noite dos premios da escena galega María Casares, que acadan a súa 30.ª edición cun total de 17 espectáculos finalistas en competición. Con once candidaturas, a peza —da autoría e dirección de Santiago Cortegoso, cofundador con Marián Bañobre da compañía— terá os seus maiores rivais en A serie clopen, do CDG (Centro Dramático Galego), con dez, e TROMSØ, de Morraoconto, con sete. Proba desa loita entre tres é que esta mesma terna xógase o galardón maior, o de mellor espectáculo do 2025; tamén o de dirección e o de dirección de movemento. A cerimonia terá lugar o próximo mércores 8 de abril no coruñés Teatro Rosalía Castro —onde se entregarán os 16 galardóns que responden a outras tantas categorías— e celebrarase co apoio da Xunta, o Concello da Coruña, a Deputación da Coruña, a Fundación Aisge, a SGAE e Gadis. Os nomes dos aspirantes déronse este mércores a coñecer en Santiago durante a tradicional festa de finalistas que acolle a cafetería Lasso do Auditorio de Galicia. Nun encontro conducido pola actriz Chus Álvarez, e que contou coa asistencia de Jacobo Sutil, director da Axencia Galega das Industrias Culturais (Agadic); Natividade González, responsable de cultura da Deputación da Coruña; Isabel Blanco, delegada de Aisge en Galicia; e Belén Yáñez, representante da SGAE, expuxéronse os detalles desta festa que organiza a Asociación de Actores e Actrices de Galicia (AAAG).
Así, Reconversión pelexará pola estatuíña nos apartados de espectáculo, dirección (Cortegoso, Carlos Álvarez-Ossorio e Natalia Feijoo), dirección de movemento (Armando Martén), actor protagonista (o propio Cortegoso), actor secundario —por partida dupla, César Goldi e Fran Lareu—, actriz secundaria (Cristina Collazo), texto orixinal (Cortegoso), espazo sonoro (Alonso Caxade), iluminación (Carlos Álvarez-Ossorio) e espazo escénico (Pablo Giráldez, o Pastor). A serie clopen aspira a impoñerse nas categorías de espectáculo, dirección (Pablo Reboleiro), dirección de movemento (Marta Alonso Tejada), actriz protagonista (Natalia Pajarito), texto orixinal (Clara Gayo e Reboleiro), espazo sonoro (Marcos PTT e Xosé Lois Romero), iluminación (Laura Iturralde), espazo escénico (Iturralde e José Faro), vestiario (Carlos Alonso) e maquillaxe (Erea Pérez). A terceira montaxe que acapara maior número de finalistas é TROMSØ, que opta aos galardóns de espectáculo, dirección (Rafa R. Martínez), dirección de movemento (Esther Latorre), espazo sonoro (Julia Ammerman e Lucía Iglesias), iluminación (José Faro Coti), espazo escénico (Rafa R. Martínez, Miguel Gendre, Lara Pouso e José Faro Coti) e vestiario (Rafa R. Martínez e Ana Gesto).
«Un deus salvaxe»
Un deus salvaxe, de Talía Teatro, opta a catro galardóns (actriz protagonista, adaptación-tradución, espazo escénico e maquillaxe) mentres que Vitória, retrato dunha denuncia, de Iria Pinheiro, pelexará por tres (actriz protagonista, actriz secundaria e texto orixinal). Alta costura, de Elefante Elegante, compite en dúas categorías (actriz secundaria e vestiario), como tamén o fai Berenguela na gaiola, de Galeatro e Xarope Tulú (adaptación-tradución e espectáculo infantil), e O libro da selva, o musical, de Ártika Cía (maquillaxe e espectáculo infantil).
Outras nove obras competirán como finalistas nalgunha categoría: Bibopalula. O espectáculo, de Ainé (mellor espectáculo infantil); Un tal Romeo, de aRamboia (actor protagonista, Fran Lareu); Mofa&Befa: Os dous de sempre, de Producións Teatráis Excéntricas (actor secundario, Josito Porto), Mala vida e pior morte de Ricardo III, tamén de Excéntricas (actor protagonista, Evaristo Calvo), Coa cabeza nas nubes, de SÖA (espectáculo infantil); A metamorfose, de Sarabela Teatro (adaptación-tradución); A biblioteca galáctica contra a IA fantástica, de Tanxarina (espectáculo de monicreques); Castelao, un corazón á intemperie, de Fantoches Baj (monicreques), e Gabinete Mirabilia, de Pablísimo (monicreques).