Gadis lanza un proxecto en TikTok para potenciar o uso do galego entre os mozos
CULTURA
Unha colaboración coa Consellería de Cultura pon en marcha este verán un concurso de vídeos creativos no que se premiarán as mellores pezas en diferentes disciplinas: arte, música, audiovisual e poesía
09 may 2023 . Actualizado a las 17:11 h.Supermercados Gadis e a Consellería de Cultura asinaron un acordo de colaboración para promover o uso do galego nas plataformas dixitais. O obxectivo é potenciar e recoñecer o talento dos mozos que utilizan o idioma propio para crear contidos orixinais e innovadores nas redes sociais.
O proxecto lanzará un concurso de vídeos creativos en TikTok este verán, entre os meses de xuño e setembro, no que se premiarán as mellores pezas en diferentes disciplinas: arte, música, audiovisual e poesía. Os criterios de valoración terán en conta a calidade técnica e do contido, así como o seu desenvolvemento. «Achegarnos á mocidade e visibilizar o seu talento, á vez que favorecemos o emprego do noso idioma aproveitando as ferramentas que nos ofrecen as plataformas dixitais é un dos nosos obxectivos. Tamén queremos amosar o valor da colaboración público-privada no eido cultural e creativo», sinalan fontes da distribuidora.
O conselleiro de Cultura, Román Rodríguez, e a directora de responsabilidade social corporativa de Gadisa Retail, Melisa Pagliaro, selaron o acordo en virtude do cal se desenvolverá esta colaboración a través da Secretaría Xeral de Política Lingüística, coa que queren poñer en valor o Día das Letras.
Como empresa 100% galega, lembra Gadis, foi pioneira no recoñecemento e difusión da lingua galega, así como das súas diferentes manifestacións culturais. Cada ano, emprende diversas iniciativas para celebrar o 17 de maio e, no 2023, prevé outras accións para dinamizar o uso do idioma común que «reforza a identidade galega».