O gañador dun Óscar Michael Dudok de Wit acudirá ao festival de animación Imaxinaria
CULTURA
O evento terá lugar na sede coruñesa de Afundación entre o 10 e o 14 de maio
15 mar 2023 . Actualizado a las 19:14 h.Pretenden reivindicar a animación «como un medio e non como un xénero». Tamén como «unha das formas máis poéticas de contar historias». E como un modo de facer películas «para nenos e para adultos». Son algunhas das ideas plasmadas polo debuxante e director de cine Alberto Vázquez na presentación de Imaxinaria, evento que dirixirá xunto á ilustradora Matilde Rodríguez. Trátase do festival dedicado ao cine de animación que terá lugar na sede coruñesa de Afundación entre o 10 e o 14 de maio. O evento, que dará a coñecer a súa programación completa nas próximas datas, contará coa presenza de Michael Dudok de Wit, gañador dun Óscar á mellor curta de animación no 2001.
Imaxinaria contará cunha sección oficial na que se poderán ver as cintas a concurso. Tamén haberá actividades paralelas: exhibición de películas fóra de concurso —entre elas, catro longametraxes «de recoñecemento internacional» di a organización—, eventos formativos, actividades para nenos, charlas e clases maxistrais con expertos de prestixio internacional, entre outros eventos.
O programa de contidos do festival estará estruturado en distintos apartados. Por un lado, a sección oficial a concurso, formada por sete bloques de proxeccións, cinco curtametraxes para público adulto e cinco infantís. Outro compartimento é foco, que aproximará ao público as obras creadas noutros países. Tamén se prevé a sección O Que Está por Vir, dedicada a presentar os proxectos en fase de preparación por parte dos cineastas galegos. E, por último, unha xornada dixital que mostrará os avances dixitais.
Vázquez, que acaba de gañar o Goya por Unicorn Wars, subliñou que o festival tamén quere servir de plataforma para a animación en Galicia, «que ten unha longa tradición e prestixio».
