«A contenda do río Miño» será representada desde este xoves ao domingo 5 de febreiro no Salón Teatro nunha coprodución do Centro Dramático Galego e a Companhia de Teatro de Braga
24 ene 2023 . Actualizado a las 17:10 h.A contenda dos labradores de Caldelas ou Entremés famoso sobre a pesca do río Miño, o texto de Gabriel Feixoo de Araúxo en 1671, que representa a primeira peza teatral en lingua galega conservada, volve ás táboas desde este xoves 26 ata o 5 de febreiro no Salón Teatro de Santiago nunha coprodución do Centro Dramático Galego (CDG) coa Companhia de Teatro de Braga. Serán nove funcións.
A montaxe, que fora estreada no 2021 no Festival de Almagro, regresa para conmemorar o 50 aniversario da súa primeira posta en escena por parte da compañía coruñesa Teatro Circo, da man de Manuel Lourenzo e José Estruch. «Este espectáculo permitiu recuperar a peza para unha nova xeración. Era unha débeda histórica do CDG», resaltou o responsable da unidade de produción teatral da Xunta e tamén director da montaxe, Fran Núñez.
A proposta recolle o texto de hai 350 anos «sen cambiar unha coma» das dez páxinas que o conforman. Iso si, a posta en escena estará acompañada de música e coreografías. Ademais, hai un vínculo co espectáculo representado hai 50 anos incluíndo voces daquel elenco orixinal do de Teatro Circo. Tamén conta cunha introdución para completar a montaxe. Fran Núñez destacou que o texto «leva implícito un diálogo con Portugal, cos recursos naturais e co noso territorio. Falamos da fronteira, dos recursos e da nosa relación como veciños».
O elenco está formado por intérpretes galegos e de fala portuguesa, non só do país veciño, senón tamén de Brasil e Mozambique. Intégrano Rogério Boane, Sílvia Brito, Carlos Feio, Eduarda Filipa, António Jorge, Grasiela Müller, Aisa Pérez, Valentina Picciau, Soange Sá e o propio Fran Núñez. «Foi unha aventura traballar un texto clásico, a temática das fronteiras é moi actual», afirmou Sílvia Brito onte no Salón Teatro durante a presentación do espectáculo, que estivo encabezada polo director da Agadic, Jacobo Sutil. O membro da Xunta de Galicia incidiu en que a montaxe «representa o que debe facer un teatro público porque está baseada no texto fundacional da dramaturxia en galego, traída a actualidade de maneira moi enriquecedora». Tamén incidiu no achegamento a Portugal e á lusofonía.
As entradas para asistir a este espectáculo xa están á vedna. As sesións serán os mércores e os domingos ás 18.00 horas e os xoves, venres e sábados, ás 20.00 horas. Mañá mércores haberá, ademais, dúas representacións escolares ás que asistirá o alumnado de diferentes centros educativos.