Falece Domingo Frades, escritor, tradutor e eminencia maior da fala estremeña
CULTURA
Académico correspondente, representaba na RAG a póla do galego medieval da que agromou un grupo dialectal formado polo valverdeiro, o largarteiro e o mañego
10 ene 2023 . Actualizado a las 22:58 h.O escritor, investigador e tradutor Domingo Frades Gaspar (San Martiño de Trebello, Cáceres, 1936-Badaxoz, 2023), eminencia maior da fala estremeña e membro correspondente da RAG desde o 2004, faleceu este martes. Destacado valedor do galego de Estremadura e, en particular, falante da variedade mañega dende o berce —unha das tres que existen no val de Jálama, na serra de Gata—, realizou un importante labor de recompilación de vocabulario, toponimia, costumes e cantigas populares, á vez que promoveu o coñecemento da existencia das falas dos concellos cacereños de Valverde do Fresno, As Ellas e San Martiño de Trebello. Colaborou ademais, como lembra a RAG, na constitución de diversas asociacións culturais, entre elas o colectivo Fala i Cultura do Val do Río Ellas, da que foi o primeiro presidente.
Axente de Extensión Agraria do Ministerio de Agricultura de profesión, compaxinou esta tarefa coa escrita de obras sobre a cultura e a lingua da serra de Gata, entre elas as monografías Vamus a falal. Notas pâ coñecel y platical en nosa fala (1992 e 2000) e Callejeiru Mañegu e a tradución á fala do Novu Testamentu (2015). Tamén cultivou a poesía.
Frades representaba na RAG o galego de Cáceres, póla do galego medieval da que agromou un grupo dialectal formado polo valverdeiro, o largarteiro e o mañego.