O OUFF 2022 converterase, con máis de 40 pezas, no epicentro do audiovisual galego
CULTURA
O festival acollerá as estreas das películas de Ángel de la Cruz e Jaime Chávarri
15 sep 2022 . Actualizado a las 15:04 h.O Festival de Cine Internacional de Ourense converterase no epicentro do audiovisual galego. Entre os días 23 de setembro e 1 de outubro o OUFF proxectará máis de corenta pezas de cineastas galegos na súa programación. Unha faceta que se complementará con coloquios cos cineastas, encontros profesionais ou a presentación da Ourense Film Commission, na que se proxectarán adiantos de filmes rodados na provincia como 13 exorcismos, de Jacobo Martínez, Honeymoon, de Enrique Otero, ou Amigos hasta la muerte, de Javier Veiga.
Estreas e pase de Chávarri
O OUFF acollerá a estrea mundial de O home e o can, de Ángel de la Cruz, e as españolas de O corpo aberto, de Ángeles Huerta; El tirabeque, de Darío Autrán e Kumo Kosa Ta? Recuerdos de Palenque, de Adrián Canoura. O festival tamén ofrecerá un pase especial de A mazá de ouro, a nova película de Jaime Chávarri. Entre as primicias estarán as primeiras imaxes do próximo filme de Xavier Villaverde: María Casares, la mujer que vivió mil vidas.