Os Resentidos celebran os 40 anos da súa formación sobre o escenario

javier becerra REDACCIÓN / LA VOZ

CULTURA

Os Resentidos presentando os temas de «Organización nautilus» o ano pasado en Santiago Sandra Alonso

A banda viguesa inicia este vernes na sala Garufa da Coruña unha xira con material novo

03 mar 2022 . Actualizado a las 17:13 h.

Siniestro Total anuncian que se retiran dos escenarios e Os Resentidos sóbense a el. «Somos grupos irmáns e compartimos moitas cousas, pero eles nunca pararon de tocar e nós, como banda con repertorio novo, deixamos de existir en 1994. Temos aínda moitos anos que recuperar por diante», ri Antón Reixa, o líder do grupo. Ese axuste comezará este sábado na Coruña (Garufa Club, 21.30 horas) na xira coa que celebran os 40 anos da fundación do grupo. Despois virán Pontevedra (25 de marzo, Sala Karma) e Santiago (10 de abril, Sala Capitol).

Aínda que a efeméride poida facer pensar nunha xira nostálxica, o grupo vén con material novo. Trátase de Organización nautilus (2021), a súa primeira gravación desde os anos noventa. Arranca marcando un punto xeográfico e emocional nas súas primeiras liñas. «Son de Vigo e non o nego», canta Reixa en Nautilus, o tema inaugural. «E iso que levo 20 anos vivindo na Coruña. Cando falo de Vigo fágoo cun sentimento que comparte moita xente de Galicia, que é a identificación non acomplexada co propio sen localismos», expón o cantante. Encóntrase moi cómodo no ambiente actual: «Nós fomos a primeira banda profesional de rock cantando en galego, algo que hoxe está totalmente asumido no rock, no pop ou no hip-hop. Todo o cosmopolitismo ben entendido parte dunha autoestima».

No repertorio actual de Os Resentidos danse cita de novo a retranca, as frases populares cunha nova significación, o espello roqueiro e tamén unha clara intencionalidade política que bota man do absurdo para dicir as mensaxes máis contundentes. En Anti-sistema expón, entre saxos travesos e guitarras fortes, a solución á crise: unha impresora doméstica que poida facer todos os billetes que se necesitan. «O diñeiro non deixa de ser unha abstracción con tanto valor que determina a vida da xente. Que pasaría se tiveramos ese recurso?», explica. Di que forma parte do compoñente rabudo do grupo. «Nós formámonos cando foi a reconversión naval. E non teño claro que o futuro de Galicia sexa o sector servizos», reflexiona.

No disco hai un tema que ben podería condensar a esencia da banda. Trátase de A xustiza pola man, un poema rabioso de Rosalía de Castro que flúe sobre as guitarras do Fight For Your Right dos Beastie Boys. Todo con suplemento de gaita. «En directo dicimos: “Imos tocar unha canción de Rosalía”, e a xente non pensa en Rosalía de Castro», comenta cun sorriso. Cualifica a escritora como «radical» e resalta a vixencia do texto: «É unha chamada total á rebeldía. Eu só cambiei un par de palabras. Metinlle a palabra plusvalía e oligarquía».

No final de Organización nautilis canta: «Se nos organizamos follamos todos». Reixa explica que a vida social ten moito que ver coa sexualidade: «O sexo debe unir as persoas, sobre todo nun momento no que culturalmente polo menos está condenada a violencia de xénero, debemos reivindicar o desexo», conclúe.