A Asociación de Actores de Galicia fixou o prazo de inscrición de espectáculos ata o 10 de marzo, e a finais de abril, despois da primeira rolda de votacións, dará a coñecer os finalistas das catorce categorías en xogo
15 feb 2022 . Actualizado a las 15:48 h.A Asociación de Actores de Galicia (AAAG) convoca os premios de teatro María Casares, cuxa inscrición está aberto ata o próximo 10 de marzo. Neste prazo, as compañías, autores e intérpretes poderán presentar as súas montaxes a concursar nos galardóns do teatro galego que neste 2022 chegan á súa 26ª edición. Poden participar todos os espectáculos de teatro de actor/actriz en lingua galega estreados entre o 1 de xaneiro e o 31 de decembro do 2021. Tamén as obras estreadas no último trimestre do 2020 que non concorreran xa aos premios na entrega anterior.
Rematado o prazo de inscrición, abrirase a primeira rolda de votacións para que o censo (conformado por preto de 450 persoas da profesión, entre asociados, finalistas e gañadores de anos anteriores, programadores da Rede Galega de Teatros e Auditorios, críticos ou xornalistas culturais) escolla a relación de finalistas en cada un dos 14 apartados no que se divide o certame. Unha vez determinadas as candidaturas, terá lugar a segunda quenda de votacións, da cal sairán os gañadores, que se darán a coñecer nunha gala de entrega que se celebrará no teatro Rosalía Castro da Coruña.
Os María Casares, organizados pola AAAG -agrupación sindical que reúne a máis de 330 profesionais da interpretación e da dirección de escena- coa colaboración de entidades e institucións como a Xunta, o Concello da Coruña, a Deputación da Coruña, a Fundación Aisge, o Padroado de Cultura do Concello de Narón ou Gadisa, entregáronse por vez primeira en 1997 e dende aquela son o gran escaparate do teatro, así como a gran festa para todos os profesionais do sector, como lembra o colectivo que promove esta celebración.
Os galardóns contan con 14 categorías: espectáculo, espectáculo infantil, actriz protagonista, actor protagonista, actriz secundaria, actor secundario, dirección, adaptación-tradución, texto orixinal, música orixinal, iluminación, escenografía, maquillaxe e vestiario.
Na entrega, lerase o Manifesto Galego no Día Mundial do Teatro e entregarase ademais o premio de honra Marisa Soto, que homenaxea e celebra tanto a traxectoria artística de persoas que co seu traballo impulsasen a profesionalización do sector, como tamén a institucións que apoiasen o desenvolvemento das artes escénicas.