«A lingua das bolboretas», de Sarabela, encabeza as candidaturas con opcións en oito categorías
30 jun 2021 . Actualizado a las 22:00 h.Os premios de teatro María Casares xa teñen finalistas. Trece espectáculos competirán na vixésimo quinta edición dos galardóns, que se entregarán nunha gala o vindeiro 9 de setembro no Teatro Rosalía de Castro da Coruña.
A lingua das bolboretas, de Sarabela Teatro, é finalista en oito categorías, incluídas espectáculo, dirección, actor protagonista e secundario, adaptación-tradución, iluminación, escenografía e vestiario. Outras tres montaxes acadaron presenza en cinco apartados dos premios. Trátase de Dreaming Juliet, de Elefante Elegante; 32m2, de ButacaZero; e Bailar agora, de Marta Alonso de Tejada. Tamén son tres as montaxes que resultaron finalistas en catro categorías dos María Casares. Son Micropectivas dun marica millenial, de Incendiaria; Os nenos da varíola, de Pérez & Fernández; e O premio, de La Quintana Teatro. Pola súa banda, O mozo da última fila, de Redrum Teatro, acadou tres finalistas. Por último, cinco obras conseguiron unha candidatura: Poeta en Nova York, de Teatro Baixo da Area; A conquista da escola de Madhubai, de Teatro do Atlántico; O libro da selva, de Teatro Avento Producións; Lázaro de Tormes, de Pedras de Cartón; e Ris Ras, de Baobab.