O xurado do galardón de literatura infantil e xuvenil valorou o tratamento literario das redes sociais
30 jun 2021 . Actualizado a las 17:23 h.Andrea Maceiras (A Coruña, 1987) foi elixida este mércores gañadora do premio Raíña Lupa de literatura infantil e xuvenil que convoca a Deputación da Coruña. O xurado elixiu de entre os 43 orixinais a concurso o seu libro Que se me parece o corazón se te esquezo, do que destacou, entre outros méritos, o seu tratamento literario das redes sociais. A obra aborda, en especial, os videoblogs, mais «dun xeito non moralizante», segundo o xurado, que subliñou que a obra «expón situacións duras sempre fuxindo da forma panfletaria». Ademais, gabaron a súa capacidade para atrapar ao lector e o bo uso da lingua.
Maceiras xa fora finalista do Raíña Lupa no 2017 con O que sei do silencio. Entre outros galardóns, posúe o Meiga Moira por Violeta tamurana e Miña querida Sherezade, o Jules Verne por Europa Express, o Lazarillo por Conta nove estrelas e o Merlín por A folla azul. Actualmente combina o seu labor como docente de secundaria coa súa vocación literaria.