A proposición non de lei a prol da igualdade lingüística chega ao Congreso sen apoios

O Congreso dos Deputados viviu este martes unha xornada que semellaba importante para o galego, pero que rematou en fracaso pola excesiva polarización política. A Cámara Baixa debateu unha proposición non de lei (PNL) para revalorizar e defender as linguas que conviven no Estado español, co obxectivo de promover e reforzar o recoñecemento da realidade plurilingüe do país.

Chegou ao hemiciclo da man da Mesa pola Normalización Lingüística e outras entidades que traballan a favor do éuscaro, o catalán, o valenciano, o asturiano ou o aragonés -Plataforma per la Llengua, Òmnium Cultural, Kontseilua, Nogara, Ciemen, Iniciativa pol Asturianu e Acció Cultural del País Valencià-. Pero unha vez alí, a proposición non tivo máis percorrido, pois non sumou os apoios que precisa para saír adiante.

Os partidos nacionalistas defenderon a proposta por voz de Mertxe Aizpurua, de EH Bildu, e tamén de Néstor Rego, do BNG, que apuntaron que en España hai un 45 por cento de cidadáns que non falan o castelán como lingua principal e instaron ao Executivo de Pedro Sánchez a respectar os seus dereitos. Esíxenlle que poña fin ao que xulgan como unha «imposición legal do castelán» en España, territorio ao que, reclaman, debe estenderse o uso das linguas cooficiais recoñecidas, garantindo o seu emprego nas propias Cortes, nos tribunais de xustiza, no ensino, nas Administracións ou en RTVE. Piden que se permita ademais que figuren no etiquetado de produtos e se acepten novas linguas como o asturiano ou o aragonés. Xunto co BNG, a iniciativa integra a Podemos, ERC, Bildu, PNV, Junts, PDECat, CUP, Equo e Compromís.

Este bloque atopou deseguida a oposición socialista, cuxo deputado Marc Lamuá (PSC) falou da «inconstitucionalidad» dunha proposta que, reprochou, «es una gran oportunidad perdida» porque só persegue «una confrontación estéril».

Polo PP, a parlamentaria ourensá Ana Belén Vázquez comezou a súa intervención defendendo o galego e recitando un poema de Manuel María. Negou que a supervivencia do idioma propio estea en risco e dixo que debe protexerse o futuro do galego, o catalán ou o éuscaro sen usalos «como mecanismo de confrontación» e considerando o castelán como «unha riqueza» e non unha lingua allea ou «imposta». É máis, engadiu, non se debe discriminar como, ao seu entender, está a ocorrer en Cataluña. Vázquez insistiu no dereito e o deber de coñecer as linguas cooficiais pero «sen opresións» e no marco «dun bilingüismo cordial e harmónico» que, dixo, funciona con éxito en Galicia.

A proposta recibiu emendas de ámbolos dous partidos. Cs, Vox e UPN tamén amosaron o seu rexeitamento a unha PNL que se someterá este xoves á votación.

Mesa pola Normalización

A Mesa pola Normalización Lingüística referendou a iniciativa coa súa presenza no Congreso dos Deputados. Ante a porta dos Leóns, o presidente da asociación, Marcos Maceiras, debullou un proxecto que, dixo, trata de apoiar o uso cotián e normalizado destes idiomas. «O que presentamos aquí é algo moi elemental. A declaración dos dereitos humanos, o pacto internacional dos dereitos civís e políticos, a carta europea das linguas rexionais minorizadas, a declaración universal de dereitos lingüísticos coinciden nun elemento que para nós é básico: calquera comunidade lingüística ten dereito a falar a súa lingua no seu propio territorio», subliñou. «É hora de que o Estado español pase da política declarativa, ratificando todos estes documentos, a unha política real, a unha política executiva», insistiu o presidente da Mesa. «Se algo hai que desterrar en calquera sociedade democrática é o racismo en todas as súas formas, incluído o racismo lingüístico, que é a versión que discrimina a persoas polo simple feito de pertencer a unha comunidade lingüística. Iso aínda pasa hoxe no Estado español co sustento do BOE», deplorou Maceiras.

---

---

---