A mocidade trata de espallar en TikTok a utilización do idioma galego nas redes sociais

Os usuarios enxalzan o impacto do «Dígochoeu», o espazo educativo sobre a lingua da CRTVG que comezou na web e cuxo éxito o levou tamén á programación televisiva

Fotograma do vídeo da campaña #aculturasegue en favor do consumo de produtos culturais
Fotograma do vídeo da campaña #aculturasegue en favor do consumo de produtos culturais

Redacción / La Voz

A mocidade vivía allea á negativa de TikTok a publicar publicidade en galego, que quedou esta semana en evidencia cando a Xunta tratou sen éxito de contratar un anuncio con esta plataforma. A campaña institucional #aculturasegue desenvolvida en Internet en favor do consumo e do ocio culturais si foi difundida en Twitter, Instagram e Spotify. Os rapaces da comunidade -os adolescentes son maioría entre os máis de mil millóns de usuarios diarios desta aplicación- móvense masivamente en TikTok e son moitos os que empregan a lingua propia nos seus contidos de forma orgánica.

Non lles gusta esta negativa, pero tan só algúns valoran medidas como o boicot, cren que o que hai que facer é insistir na utilización do idioma de Rosalía e facer que sexa a evidencia a que actúe. É dicir, que TikTok acabará por entender a realidade plurilingüe de España e que rematará por acceder a darlle curso á publicidade en galego, éuscaro, catalán, valenciano ou outra lingua cooficial que rexa no sistema autonómico.

A etiquetas reivindicativas como #AlgoDeSentidiñoTikTok, #TiktokSéRiquiñoCoNosoGaleguiño e #oGalegoNoTikTokXa, demandando á compañía chinesa que reconduza a súa negativa, súmanse colectivos como as Xuventudes Socialistas de Ourense, que veñen de convocar, este xoves, un concurso de vídeos en TikTok para promover o uso do galego en redes sociais, e nesta en particular.

Tomaron a idea dunha iniciativa similar que o Concello de Barbadás puxo en marcha no Nadal, pero eles redirixiron o seu esforzo cara o idioma con vistas, de paso, a festexar mañá o Día Internacional da Lingua Materna. «Escollemos a plataforma onde máis rapazada hai agora mesmo, onde máis vídeos consumen, pero abrimos o arco á participación de persoas de entre os 14 e 32 anos de idade», explica Iván Losada, secretario de organización da agrupación política, que estudou Comunicación Audiovisual. Losada anota que organizaron este certame antes de coñecer a información que publicou La Voz de Galicia, pero a negativa de TikTok non só non os desanima, senón que aínda lle dá máis sentido ao seu empeño na defensa do idioma. «A rixidez da norma de TikTok moveunos a reforzar a campaña, deunos máis pulo», subliña para engadir que pensa que é unha mágoa que moitos dos usuarios galegos que incorporan contidos nesta plataforma non os preparen en galego. Ese é un dos espazos cara onde dirixen o seu chamamento.

«Fartos de tópicos»

Losada, que ten 23 anos, é ademais un pouco crítico co enfoque dalgúns dos contidos elaborados en galego en TikTok, que pensa que inciden demasiado nos tópicos, as parodias e os estereotipos. «Son cousas que estamos fartos de ver en redes sociais, e o corpo pídenos vontade por acadar outros produtos que, sen necesidade de abandonar o carácter lúdico, sexan máis construtivos, máis creativos, máis imaxinativos», insiste. O entretemento é clave, admite, para achegar o galego aos centos e centos de adolescentes -«un auténtico bum», afirma- que inzan as rúas das cidades e vilas galegas «gravando bailes e desafíos cos móbiles e botando unhas risas». Hai que armar con eles -engade- unha comunidade virtual que vexa no galego unha ferramenta válida para compartir e viralizar contidos. «Normalizar», resume.

No espírito a perseguir, a mocidade galega sitúa o Xabarín Club -cuxos contidos andan agora arrombados na segunda canle da TVG, lamentan-, e que acha un equivalente no impacto que ten hoxe Dígochoeu, o proxecto educativo da CRTVG en torno ao galego que conduce a xornalista Esther Estévez. Naceu na web dos servizos informativos e, tras o éxito alcanzado, pasou a concorrer no telexornal televisivo. A fórmula é tan vella como innovadora, frescura, dinamismo, diversión, humor e intelixencia. A súa conta en TikTok ten case 82.000 seguidores -o que fala do seu impacto- e está presente tamén en Instagram, Twitter, Facebook e YouTube.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
11 votos
Comentarios

A mocidade trata de espallar en TikTok a utilización do idioma galego nas redes sociais