A Academia reivindica coas figuras de Valentín e Xela Arias a transmisión xeracional do idioma

A entidade recupera un texto que o tradutor escribiu en 1968, inspirado na crianza en galego da futura escritora

Xela Arias e o texto que escribiu seu pai cando ela era nena
Xela Arias e o texto que escribiu seu pai cando ela era nena

Redacción

En 1968, o mestre e tradutor Valentín Arias escribiu o relato Xeliña fala galego, no que relataba a experiencia como nena criada en galego da súa filla Xela, nacida seis anos antes a quen se lle dedica neste 2021 o Día das Letras Galegas. Ese texto veno de recuperar na súa web a Real Academia Galega co gallo do Día da Lingua Materna, instaurado pola Unesco e que se celebra este domingo. A entidade non só homenaxe así a pai e filla, dúas figuras importantes para a tradución e a literatura en galego, senón que lembra tamén a importancia da transmisión xeracional do idioma. «A proposta da Unesco ten este ano un obxectivo moi concreto: fomentar o multilingüismo para a inclusión na educación e na sociedade. O texto de Valentín Arias Xeliña fala galego é moi significativo ao respecto. Multilingüismo sen renunciar ás raíces, profundando nelas, para construír unha sociedade sen complexos», argumenta o presidente da RAG, Víctor F. Freixanes nun artigo titulado Lingua da memoria e que tamén recolle a web da institución.

O texto de Valentín Arias foi publicado nun especial das festas de San Xoán de Sarria. A protagonista, Xeliña, ten como lingua nai o galego por decisión dos seus proxenitores, malia os prexuízos sociais. O conto xira arredor da idea de que a nena, criada en galego e que xa sabe castelán, partirá con vantaxe respecto dos monolingües, xa que contará cunha maior facilidade para a aprendizaxe dos idiomas. Un relato que resultou profético, xa que Xela Arias sería unha destacada tradutora, ademais de poeta e editora. Un cumprido exemplo a prol do multilingüismo.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
8 votos
Comentarios

A Academia reivindica coas figuras de Valentín e Xela Arias a transmisión xeracional do idioma