Os nacionalistas avogan por asignar ao sector un 1 % dos orzamentos autonómicos
17 dic 2020 . Actualizado a las 05:00 h.A portavoz nacional do BNG, Ana Pontón, celebrou este mércores un encontro con representantes dos sectores culturais, un eido, segundo Pontón, que vive con desesperación a crise por mor do coronavirus. «Agora a situación é crítica e precisa de medidas urxentes no inmediato para saír da uci e medidas a medio e longo prazo para consolidarse e recuperar todo o seu potencial», declarou.
Esa medida urxente pasa por un rescate de 28 millóns para a cultura, con cargo os orzamentos autonómicos do 2021, para o que os nacionalistas presentarán unha emenda aos presupostos que se debaterá no Parlamento o vindeiro luns. A proposta busca atender as necesidades máis inmediatas: afrontar os gastos derivados de manter alugueiros, créditos e salarios nun contexto no que os ingresos son practicamente inexistentes debido ás restricións sanitarias.
Ademais, Pontón proporá modificar os usos dunha parte dos fondos destinados ao Xacobeo 2021 e derivalos ao apoio dos sectores culturais. Para ese mesmo ano, o ideal do BNG é que os fondos para cultura representen un 1 % dos orzamentos, unha porcentaxe que se iría incrementando progresivamente ata acadar o 1,5 % nos vindeiros dez anos. Na actualidade, a contía é de 95 millóns, o equivalente ao 0,82 %.
Pontón lembrou tamén que a crise sanitaria non fixo máis que agravar os problemas causados pola anterior, a económica, da que o sector aínda non se recuperara plenamente. «Temos talento, capacidade, potencial e non podemos deixar que a crise se leve por diante un sector que está nunha situación desesperada», concluíu Pontón.