Ledicia Costas e Chema Prado, entre os Premios da Cultura Galega 2020

j. oliva REDACCIÓN / LA VOZ BARCELONA / EFE

CULTURA

M.MORALEJO

Fegatea logra o galardón de artes escénicas y aCentral Folque, o musical

06 dic 2020 . Actualizado a las 05:00 h.

A escritora Ledicia Costas, o exdirector da Filmoteca Española Chema Prado, a Federación de Teatro Afeccionado de Galicia (Fegatea), aCentral Folque, o dinamizador da cultura e lingua galegas Xosé González Martínez, a Fundación Penzol, o fotógrafo Xurxo Lobato, e a responsable do Centro de Estudos Galegos en Budapest, Ildiko Szijj son os galardoados nos Premios da Cultura Galega 2020. Os premiados foron distinguidos nas modalidades de Letras, Audiovisual, Artes Escénicas, Música, Lingua, Patrimonio Cultural, Artes Plásticas, e Proxección Exterior respectivamente.

De Ledicia Costas valórase que sexa «unha das escritoras máis lidas e premiadas do panorama literario galego e tamén unha das máis traducidas, o que a converte nunha excelente difusora da lingua e literatura, da creación e da cultura galegas en Galicia e no resto do mundo». Destácase tamén o feito de que achegue a lingua galega ás xeracións máis novas. A autora ten recibido xa numerosos galardóns. Foi distinguida co Premio Nacional de Literatura Infantil e Xuvenil.

O galardón en Audiovisual é para Chema Prado, o director máis lonxevo da Filmoteca Española, cargo que ostentou entre 1989 e o 2016. Cronista de festivais, achegou a grandes directores a Galicia. Destaca «polo seu labor a prol da preservación do patrimonio cinematográfico».

En Artes Escénicas o recoñecemento é para a Federación de Teatro Afeccionado de Galicia (Fegatea), unha entidade privada sen ánimo de lucro que naceu hai vinte anos da man de sete grupos de teatro (Asociación de Mulleres de Moaña, Atrezo, Aurín, Ditea, Escoitade, Metátese e O Trasno). As agrupacións escénicas locais desenvolveron un circuíto de teatro amateur por toda Galicia, ademais de contribuír á proxección da cita anual do teatro galego, no marco do Festival Agustín Magán, en Santiago de Compostela, e a través do encontro Platta. É a maior estrutura teatral e organizada que existe neste momento na comunidade.

Estes premios distinguen no eido da música a aCentral Folque, que iniciou a súa andaina como Conservatorio de Música Tradicional e Folque de Lalín (2000-2007), centrada no ensino musical de diferentes instrumentos musicais non estudados habitualmente, así como da historia da música galega, etnomusicoloxía ou patrimonio musical. Tamén desenvolve un intenso traballo na produción de eventos musicais.

No apartado de Lingua o premiado é Xosé González Martínez, polo seu traballo como dinamizador «no máis amplo da palabra, da cultura e da lingua galegas». É o creador do primeiro servizo de normalización lingüística de Galicia, no concello de Redondela, desde o que traballou coa sala do Tribunal Superior de Xustiza de Galicia ata que chegou a primeira sentenza en lingua galega en 1985. González Martínez creou o colectivo Galeguizar Galicia, que traballa na normalización en distintos eidos.

O galardón na modalidade de Patrimonio Cultural recae na Fundación Penzol, creada en 1963 por iniciativa de Fermín Penzol, cando doa a súa biblioteca especializada en temas galegos para que sexa de acceso público. Hoxe as coleccións están formadas por máis de 47.000 títulos de monografías impresas desde o século XV, uns 3.800 títulos de publicacións periódicas, 106 títulos de libros manuscritos do século XVII ao XIX e 300 diplomas en pergameo, datados do século XII ata o XVII.

No campo das artes plásticas o premiado foi o fotógrafo Xurxo Lobato, que iniciou a súa traxectoria profesional nos anos setenta, traballou en distintos medios e é Académico numerario da Real Academia Galega de Belas Artes.

O premio Cultura Galega de Proxección Exterior recoñece a Ildiko Szijj, responsable do Centro de Estudos Galegos en Budapest desde o ano 2014.

O xurado destes premios fallou onte en Santiago de Compostela e estivo presidido polo conselleiro de Cultura, Educación e Universidade Román Rodríguez.