Megálitos

CULTURA

24 nov 2020 . Actualizado a las 05:00 h.

Menhires, dolmens e crómlechs son os tres principais monumentos que definen a arte megalítica que nace na fachada atlántica europea. Son estruturas feitas con pedras de grandes dimensións e construídas con algunha función que aínda hoxe está dentro do ámbito do especulativo xa que non está de todo clara. O máis probable, polos achados, é que fosen monumentos relixiosos, relacionados con antigos rituais funerarios pero tamén hai quen fala deles como elementos de demarcación territorial ou mesmamente con funcións astronómicas.

Os menhires son pedras ergueitas chantadas no chan e soen aparecer en solitario ou en diferentes aliñacións, a veces de centos deles como pode ser a de Carnac, no sur da Bretaña, onde tiven a sorte de estar e de ver as ringleiras interminables formadas por milleiros destes menhires, algúns deles de grandes dimensións.

En Galicia tamén se erguían este tipo de megálitos aquí denominados comunmente como pedrafitas e sen ser tan abundantes e espectaculares como na Bretaña si temos bos exemplos como o chamado A Lapa de Gargantáns en Moraña (Pontevedra) ou a Pedra Alta de Antela en Sarreaus (Ourense), entre moitos.