A asociación distingue dende hai 43 anos a actividade cultural galega
22 nov 2020 . Actualizado a las 05:00 h.Baixo o lema «A Nosa Fala. Na súa acea a moerse está o pan do porvir», de Ricardo Carvalho Calero, desenvolveuse onte en Vigo a cerimonia de entrega dos galardóns correspondentes a XLIIIª edición dos Premios da Crítica de Galicia, que este ano estivo, como o resto das actividades, mediatizada polas medidas de seguridade sanitaria. A asociación cultural galega distingue as mellores propostas realizadas por un xurado en oito modalidades culturais e científicas.
A película O que arde, de Oliver Laxe, levouse o premio de Cine e Artes Audiovisuais. O xurado salientou da película as «resonancias da nosa lingua, a sabedoría dun atávico legado, a procura dunha emoción, o coñecemento mundo adiante».
A Festa do marisco do Grove foi distinguida co premio de Cultura Gastronómica por ser un evento cultural internacional, que convoca a máis de 200.000 persoas, que edita os seus catálogos en galego e catro idiomas máis, e que potencia os alimentos naturais do mar, paralelamente con dúas semanas de actividade cultural.
O premio correspondente ás artes plásticas recaeu na compañía Os Monicreques de Kukas, pioneira en Galicia nesta modalidade teatral. O artista Alfonso Costa, cunha traxectoria de cincuenta anos, gañou o premio de artes plásticas.
Pola súa parte, o premio de iniciativas culturais e científicas foi para GCiencia. Portal da Ciencia Galega polo fomento e transmisión de contidos científicos e tecnolóxicos en lingua galega. A decana das compositoras galegas, Margarita Viso, recibiu o premio de Música.
O libro «Feliz idade», da poeta Olga Novo, gañou o galardón dedicado á creación literaria
Olga Novo, recentemente gañadora do Premio Nacional de Poesía, obtivo o galardón correspondente á creación literaria pola súa obra Feliz idade. O xurado salientou desta obra «a forza lírica coa que converte as vivencias persoais nun feito poético universal, enraizado no máis fondo da nosa propia identidade cultural».
Pola súa banda, o premio que distingue a mellor investigación do presente ano recaeu no traballo Anarquistas galegos en América , de Bieito Alonso. Subliñou o xurado desta obra «o entrelazado do tema da emigración a través de historias conectadas de homes e mulleres desde diversos puntos de América e Galicia».
Esta XLIIIª edición dos Premios da Crítica de Galicia estivo patrocinada polo Concello de Vigo, A Xunta de Galicia e a Deputación Provincial de Pontevedra, sendo entidades colaboradoras Afundación e Sargadelos, autor das figuras entregadas.