Unha exposición na Fundación Luis Seoane reivindica a figura de Lolita Díaz Baliño

A tía de Isaac Díaz Pardo protagoniza o Día da Ilustración do 2021

Debuxos «Camino de Compostela» (1928) e  «Esperando el regreso» (1927) realizados por Lolita Díaz Baliño (1905–1963) para a publicación bonaerense «Céltiga. Revista Gallega». Á dereita, retrato fotográfico da artista
Debuxos «Camino de Compostela» (1928) e «Esperando el regreso» (1927) realizados por Lolita Díaz Baliño (1905–1963) para a publicación bonaerense «Céltiga. Revista Gallega». Á dereita, retrato fotográfico da artista

redacción / la voz

A figura e a obra de Lolita Díaz Baliño (A Coruña, 1905-1963) protagonizarán o Día da Ilustración do 2021 que, como todos os anos, festéxase o 30 de xaneiro, a data que lembra o nacemento de Castelao. A celebración -instaurada no 2004 pola Consellería de Cultura e a Asociación Galega de Profesionais da Ilustración- honra desta volta a unha creadora, destacada ilustradora e docente, que foi a primeira muller en ingresar na Real Academia de Belas Artes -xunto coa pintora Carmen Corredoyra, en 1938- e que foi membro fundador da Asociación de Artistas da Coruña.

Coincidindo con esta efeméride, a Fundación Luis Seoane inaugurará en marzo A realidade soñada. Lolita Díaz Baliño, unha exposición antolóxica ao redor da artista galega comisariada pola crítica de arte e xestora cultural Rosario Sarmiento. Por vez primeira, reunirase un conxunto de augadas, debuxos, colaxes, ilustracións en revistas, obxectos e documentación diversa procedente de coleccións particulares e de institucións públicas, nun proxecto que fará unha fonda revisión da traxectoria desta creadora, inxustamente esquecida ata este momento pola historia da arte en Galicia, lamenta a fundación.

A recuperación e posta en valor da obra de Lolita Díaz Baliño estará acompañada por un catálogo que, ademais de constituír a memoria do proxecto expositivo da Fundación Luis Seoane, recollerá o traballo de investigación e documentación realizado pola comisaria da mostra, afondando nos aspectos biográficos, creativos e pedagóxicos dunha artista que deixaría unha importante pegada no labor posterior de varias xeracións de creadoras.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
2 votos
Comentarios

Unha exposición na Fundación Luis Seoane reivindica a figura de Lolita Díaz Baliño