A Xunta entra na Fundación Sargadelos para reactivar o seu legado

A Cidade da Cultura dedicará en novembro unha exposición a Díaz Pardo

A mostra no Gaiás incluirá obras de arte e obxectos persoais de Díaz Pardo
A mostra no Gaiás incluirá obras de arte e obxectos persoais de Díaz Pardo

Redacción

A Xunta comunicou este luns a súa incorporación ao padroado da Fundación Sargadelos tras o acordo acadado coa firma. O obxectivo desta implicación do goberno autonómico é traballar na reactivación do legado cultural da marca, un referente para Galicia. O conselleiro de Cultura, Román Rodríguez, que participou no encontro, cualificou a decisión como «unha oportunidade fantástica para poñer en valor, para impulsar e promocionar a innegable transcendencia e importancia que ten Sargadelos no seu conxunto na cultura galega». Ademais do conselleiro, a Xunta está representada na entidade polo secretario xeral de Cultura, Anxo M. Lorenzo.

A colaboración coincide tamén coa conmemoración do centenario de Isaac Díaz Pardo, a quen se lle dedica unha exposición que abrirá na Cidade da Cultura o vindeiro día 6 de novembro. As miradas de Isaac ten por comisarios a dous dos seus fillos, Xosé e Camilo Díaz Arias de Castro, e estará composta por obras de arte, obxectos persoais, fotografías, textos, murais, documentos e proxeccións. Poderá visitarse ata o 4 de abril do 2021. Trátase da primeira grande mostra dedicada a Díaz Pardo despois do seu pasamento, no 2012, e ten como obxectivo facer un achegamento a un dos intelectuais máis decisivos na defensa da cultura galega no pasado século. 

O conxunto de Cervo

Ademais, o conxunto da fábrica de Sargadelos en Cervo, recoñecido como ben de interese cultural dende o 2014, será obxecto dun plan de reactivación, como primeiro paso dun amplo proxecto autonómico. Conta con diversas iniciativas que implican á Xunta e que teñen por obxectivo poñer en valor e difundir o legado cultural de máximo nivel de Díaz Pardo e Luís Seoane, sen esquecer a súa pegada nas instalacións do Castro, en Sada, e mais en Santiago. Román Rodríguez lembrou a inauguración o ano pasado da primeira fase do Museo de Sargadelos, un proxecto expositivo no concello lucense que recolle a historia da fábrica de cerámica e que ten previsto recuperar tamén a casa na que viviu Díaz Pardo.

A primeira fase do proxecto museo gráfico componse de sete salas expositivas nas que amosar parte do patrimonio de Sargadelos, e que se completa con pezas de olería tradicional, obras de Seoane e de Díaz Pardo, xoiería, vidro e colaboracións de artistas e escritores, como Silverio Rivas e Camilo José Cela. Tamén se recuperou o auditorio, onde se desenvolverán experiencias culturais e proxeccións, así como a antiga sala de reunións, agora cun cometido expositivo, e a antigua Biblioteca do Seminario.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
6 votos
Comentarios

A Xunta entra na Fundación Sargadelos para reactivar o seu legado