Milladoiro celebra os 40 anos do seu primeiro disco, un «fito e un revulsivo»

Montse García Iglesias
Montse García SANTIAGO / LA VOZ

CULTURA

Milladoiro presentou este luns a xira por Galicia, que pretende sexa só un punto de inicio
Milladoiro presentou este luns a xira por Galicia, que pretende sexa só un punto de inicio Sandra Alonso

Empezará o día 24 en Mos unha xira de once concertos por Galicia

20 oct 2020 . Actualizado a las 05:00 h.

A Galicia de Maeloc. Trece temas compoñen ese traballo no que por primeira vez na música galega se empregaban de xeito conxunto a gaita galega, a ocarina, a arpa, frautas e a zanfona, entre outros instrumentos. Esa carta de presentación do grupo Milladoiro cumpre 40 anos e para conmemoralo a formación iniciará unha xira de once concertos por Galicia, que terá a súa primeira parada o día 24 deste mes en Mos e despois recalará en Santiago, O Pino, A Estrada, Ames, Tui, Monforte, Portas, Vilanova de Arousa, O Barco de Valdeorras e Sobrado dos Monxes.

Este debut discográfico de Milladoiro con A Galicia de Maeloc «foi un fito e un revulsivo na música galega», lembrou este luns Pepe Ferreirós, que xunto con Ramón García -Moncho Milladoiro- e Nando Casal, integra desde o inicio a formación. Os primeiros ensaios foron na casa dos pais de Pepe en Catoira. «Ata apuntalaron o piso por medo a que lle caese durante os ensaios», afirmou entre sorrisos Moncho. Daquela «non eran tempos fáciles para a música tradicional e os que apostabamos por ela tampouco tiñamos unhas perspectivas moi claras. Cando nos empezamos a reunir na casa dos meus pais en Catoira para facer os ensaios, pasabámolo moi ben. Nós estabamos seguros de que o que facíamos, para nós, valía, pero non tiñamos a seguridade de que iso fose a transcender. A sorpresa chegou cando nese concerto xa mítico nos Salesianos na Coruña se encheu de xente. Iso foi como un espaldarazo, era como se a xente estivera agardando por algo así e nos tocou realizalo a nós. Se aquel recital pasase sen pena nin gloria, posiblemente hoxe non estariamos aquí», relata Pepe Ferreirós.

Agora, corenta anos despois dese disco gravado nos estudos Audiofilm de Madrid e que se converteu no primeiro traballo galego editado no mercado francés, Milladoiro quería conmemoralo cunha xira. A previsión era contar con corenta concertos non só por Galicia, senón tamén alén das nosas fronteiras, pero a pandemia obrigou a cambiar, de momento, ese proxecto inicial. «Hai uns meses xa dabamos a xira por perdida, por imposible, pero só a tivemos que adiar», explicou Moncho García. Agora serán once concertos, para o que contan co apoio da Xunta de Galicia, a quen lle agradeceu o «atrevemento» de querer facer actuacións nestes momentos difíciles. «Gustaríanos que estas actuacións sexan o inicio dunha xira que chegue a eses corenta concertos. Non decaemos na idea de que poidamos ter presenza fóra, pero facer once concertos xa é un motivo de satisfacción», engadiu. Xa hai pechado algún concerto fóra, como en Murcia.