Peregrinar coa Xeración Nós en tempo real

O Consello da Cultura recrea unha andaina de 1926 de Otero e Risco

Ben-Cho-Shey, Risco e Otero, no pazo Gaión de Ourense, durante a viaxe que fixeron a Santo André de Teixido en 1927
Ben-Cho-Shey, Risco e Otero, no pazo Gaión de Ourense, durante a viaxe que fixeron a Santo André de Teixido en 1927

redacción / la voz

Ás cinco da mañá do 8 de xullo de 1926 un grupo de amigos iniciaron na Ponte Nova de Ourense una andaina que os levarían, ao longo de catro xornadas, a Santiago. Eran Ramón Otero Pedrayo, Vicente Risco, Lois Feixóo e Antón Sánchez, aos que se sumaron Afonso Vázquez Monxardín e Florentino López Cuevillas en Silleda. Era ano Xacobeo e a peregrinación a pé era un dos xeitos preferidos que os compoñentes da Xeración Nós tiñan de coñecer o país. Se o mapa de Fontán acadara a condición de símbolo, non menos importante era o contacto directo coa terra, coa paisaxe e os seus habitantes.

Desta viaxe quedou constancia nas crónicas do escritor compostelán Xavier Pardo Badía que se publicaron en A Nosa Terra. Agora, quen queira sumarse de xeito virtual a aquel percorrido, pode facelo nun especial que inicia hoxe o Consello da Cultura, a través tanto da súa web como nas súas redes sociais. Trátase da versión multimedia dos oito artigos de Pardo, ademais dunha adaptación do itinerario ao formato dixital. A proposta complétase cun artigo de Afonso Vázquez Monxardín, neto dun dos peregrinos orixinais, no que aborda a relevancia cultural e actual da viaxe. A retransmisión en Facebook e Twitter permitirá recrear a andaina en tempo real e preguntarse como serían as excursións daqueles intelectuais de poder dispoñer de redes sociais. 

Pico Sacro

Tras partir de Ourense aquel 8 de xullo de 1926, o grupo pasou por Amoeiro e deu por rematada a xornada no Carballiño. O segundo día madrugaron outra vez: saíron ás seis e media da mañá e o día prolongouse ata entrada a madrugada, cando chegaron a Silleda. O sábado, coas incorporacións de Cuevillas e Monxardín, chegados no Castromil, avanzan por Chapa, Bandeira, Balboa e rematan en Ponte Ulla. O derradeiro día recollen no Pico Sacro a un grupo de alumnos do Seminario de Estudos Galegos, entre os que se contaban Lois Tobío e Antonio Fraguas, ata entrar en Santiago, polas súas «tortuosas e suxestivas rúas», segundo Pardo.

Outra viaxe de Otero e Risco, xunto con Ben-Cho-Shey, levaría á Xeración Nós ata Santo André de Teixido case un ano despois, o 4 de xullo de 1927. Un traxecto que inspiraría hai catro anos a película Pelerinaxes, do director Simone Saibane, así como un ensaio, De camiños, viaxeiros e camiñantes, de Santiago Lamas e Alfonso Mato, que acadou o premio Ramón Piñeiro.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
3 votos
Comentarios

Peregrinar coa Xeración Nós en tempo real