O OUFF estreará a nova versión da película «A metade da vida»

A obra de Raúl Veiga chegará remasterizada e reducida


ourense / la voz

Logo de anunciar a estrea mundial de Olvido e León, de Xavier Bermúdez, o OUFF suma un novo primeiro pase: a versión remasterizada de A metade de vida, a película de Raúl Veiga que se converteu nun fito do audiovisual de Galicia: foi o único filme galego da década, rodouse en 1994, e todo o equipo -dos técnicos ao elenco- era galego.

A película de Raúl Veiga estaba inspirada, en parte, nun conto de Xosé Luís Méndez Ferrín e o director tamén exerceu como guionista. A metade da vida narra a historia dun triángulo amoroso nunha cidade galega dos anos 80. Os protagonistas son un músico de jazz -chamado H. Eire-, o seu amigo Pedro e a moza deste e amante do músico, Amalia. Na vida de Eire aparecen ademais un tío e a súa sobriña: o primeiro ancorado no seu interese pola literatura e a segunda en converterse nunha moza interesante.

«Máis amable co público»

A versión que chegará ao Festival Internacional de Cine de Ourense, que se celebrará do 25 de setembro ao 3 de outubro, é unha peza restaurada e reeditada, con mudanzas na montaxe respecto da versión orixinal pensando «no beneficio do espectador, agora é unha experiencia máis agradable froito dos anos de experiencia que fun acumulando. A esencia do filme é a mesma, non se desnaturalizou en absoluto, mellorou», segundo sinala Raúl Veiga. A imaxe foi restaurada totalmente e o son «é moito máis amable co público». Para o realizador galego o que se poderá ver no OUFF «trátase dunha versión ‘redux’ pero que, ao contrario do que sucede con Coppola e a súa versión de Apocalypse Now, acurta a duración da película facéndoa máis condensada pero mantendo o espírito da orixinal. O carácter do filme presérvase pero a comunicación mellora».

De María Bouzas a Chao

Dende o OUFF sinalan que a reestrea da remasterizada A metade da vida tamén «quere servir de homenaxe a toda unha xeración de actores galegos que comezaban a súa carreira tales como María Bouzas -que recibiu no último OUFF o Premio a toda unha traxectoria da Fundación AISGE-, Evaristo Calvo e Alfonso Agra, que dan vida ao trío protagonista, xunto con Mela Casal, Isabel Vallejo e, especialmente, co actor ribadaviense Ernesto Chao».

Para o crítico e coordinador artístico do OUFF, Miguel Anxo Fernández, a exhibición «desta película, que considero heroica polo tempo no que se produciu e as condicións daquela, correspóndese coa idea de consolidar o festival como a casa propia do audiovisual galego».

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Comentarios

O OUFF estreará a nova versión da película «A metade da vida»