O Quixote imbatible


Se cadra cada vez hai menos quixotes na nosa realidade social e tamén na literaria. Quizais o noso mundo está a empequenecerse e xa non caben nel personaxes coma o de Cervantes. O escritor aragonés Ramón J. Sender, que combateu na Guerra Civil ás ordes do galego Enrique Líster -que o tivo primeiro coma un mando no Quinto Rexemento e logo afastouno por causas non clarexadas- foi un dos escritores máis interesantes e vitalistas do século XX español, autor dunhas obras literarias cheas de vigor e de calidade. El falou sempre moi ben de Cervantes e deixounos unhas novelas moi notables que non perderon actualidade… Pero que nada teñen que ver co Quixote!

Tivo que ser un ruso, o grande Fiodor Dostoievski -mestre de Freud e de Kafka- quen afirmou con rotundidade que o Don Quixote da Mancha «é o libro máis triste que escribiu a humanidade, aínda que aparentemente non haxa nel máis que motivos para rir». Dostoievski foi quizais o escritor máis fascinado e deslumbrado pola magna obra de Miguel de Cervantes. E o propio Tolstói intentou desafialo desde obras coma Resurrección, pero sen éxito. Entre os hoxe vivos, quizais é Mario Vargas Llosa o que lle ten feito maiores recoñecementos a Tolstói, porque a Cervantes xa non é posible discutirlle nada.

Cervantes e Shakespeare non morreron o mesmo día de 1616 (como se ten dito), pero case, isto é, finaron con pouco tempo de diferenza. Os dous puxéronlle o ramo a toda a literatura precedente e alumearon un tempo novo. Por isto sempre ten sentido recordalos e escribir sobre eles, veña ou non veña a conto.

Esta é unha realidade que certificou o grande facedor de películas Orson Welles, moi admirador dos dous. Por mala sorte, non puido terminar o seu filme sobre o Quixote que con tanta ilusión foi rodando en España. Unha montaxe moi discutible foi estreada en Sevilla con motivo da Exposición Universal de 1992. Por desgraza alí non estaba o traballo final de Welles, que, con seguridade, aspiraba a estar á altura da homenaxe que xa lle fixera a Shakespeare en Badaladas a medianoite. Cousas que pasan cun Quixote imbatible.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Comentarios

O Quixote imbatible