Culturgal, a feira para tomarlle o pulso á cultura galega

O conselleiro Román Rodríguez subliñou o carácter «diverso, aberto e en crecemento» do certame que se celebra en Pontevedra

A tecnoloxía tamén está presente no Culturgal, como comprobou o conselleiro Román Rodríguez
A tecnoloxía tamén está presente no Culturgal, como comprobou o conselleiro Román Rodríguez

pontevedra / la voz

Arredor de 15.000 persoas pasarán esta fin de semana polo Pazo da Cultura de Pontevedra para coñecer os avances das industrias culturais galegas a través do Culturgal, que reúne no recinto feiral a 85 expositores e 18 máis no espazo Arte Contemporánea.

A feira arrancou este venres coa Xunta como principal patrocinadora do evento, cunha achega de 65.000 euros e un total de 24 actividades de dinamización e promoción.

Ata o stand autonómico acercouse o conselleiro de Cultura, Román Rodríguez, xunto coa concelleira local Carmen Fouces, e subliñou o carácter «diverso, aberto e en crecemento» da feira e explicou que o Culturgal é «unha das mellores oportunidades para tomarlle o pulso á cultura galega que está acontecendo», destacando o feito de que integra a meirande parte dos protagonistas e profesionais da cultura galega arredor dun evento de lecer cultural do máximo interese.

Traballo activo

Tamén Carmen Fouces destacou a aposta do Concello de Pontevedra pola cultura propia que se «constrúe cun traballo activo e continuado na formación de novos públicos e na promoción de eventos que crean un caldo de cultivo propicio para a cultura galega».

Hoxe sucederanse no recinto feira máis de 65 actividades ao longo de todo o día.

Cinco espazos axeitados para os contidos da feira

Baixo o lema «Dálle unha volta á feira!», a presente edición do Culturgal presenta como principal novidade a redistribución espacial do recinto feiral e unha mellor adecuación dos escenarios aos contidos da feira. Hai un espazo infantil con contacontos, baile, obradoiros e ciencia; un foro con presentacións e encontros profesionais; unha carpa, con espectáculos e capacidade máxima para 400 persoas; unha zona dedicada ao libro con presentacións de lanzamentos, premios e outras novidades e cinema, un espazo para traballos audiovisuais e avance dos que virán, ademais da zona dedicada á arte contemporánea.

Culturgal será esta fin de semana un escaparate da actividade cultural galega con galerías, editoriais, librarías, axencias, artesáns, etcétera.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
1 votos
Comentarios

Culturgal, a feira para tomarlle o pulso á cultura galega