Cunqueiro en San Martiño


Foi unha mágoa que ninguén gravase -porque coido que non a gravou ninguén- a intervención pública de Álvaro Cunqueiro ante a basílica de San Martiño de Mondoñedo (Foz) o 11 de novembro de 1966. Foi unha mágoa porque as palabras máxicas de Cunqueiro seica estiveron á altura da beleza do que tiña arredor e que motivou a súa brillante alocución, feita coa orixinalidade poética que nel era habitual.

Suso Fernández, cronista oficial de Foz, foi testemuña do acto e soubo dar conta del. Seica se trataba de festexar o remate parcial das obras de conservación e restauración que, desde un ano antes, se viñan facendo alí, impulsadas pola Dirección Xeral de Belas Artes, baixo a responsabilidade técnica do arqueólogo e profesor da USC Manuel Chamoso Lamas. Alí concentráronse aquel día de 1966 autoridades, xente do mundo da cultura e moita veciñanza entre o público. E alí foi, na fermosa praciña da Fonte da Zapata, onde o luminoso escritor de Mondoñedo puxo en pé un verdadeiro canto poético sobre o valor histórico e artístico do templo.

Suso Fernández lembra aínda frases e metáforas que oíu aquel día, cando Cunqueiro, acariñando coa súa ollada as pedras convertidas en imaxes, aseguraba que parecían «labradas por mans imposibles», e engadía que alí se facía verdade a frase do británico John Ruskin segundo a que «nas catedrais os anxos poñían unha man nunha voluta ou nun capitel, para expresar de modo admirable algún misterio». Quizais tamén aquí -dixo don Álvaro- «anxos cantores deron lección aos que labraron este templo».

Se Cunqueiro levantase hoxe a cabeza, repetiría este canto? Fernández cre que si, pero sospeita que o escritor de Mondoñedo sería «moi crítico» con algunhas decisións adoptadas, como a localización dos retretes na antesala do monumento. Non dubida, en cambio, de que a avaliación de Cunqueiro sería hoxe igual de entusiasta. Porque o autor de Merlín e familia sabía ver o verdadeiro e profundo neste eido de sabedoría. E os visitantes de hoxe temos a obriga de seguir aprendendo, porque só quen descifra os segredos do pasado pode entender os do presente e os do futuro. Por iso é tan importante atinar coa conservación e recuperación deste espazo.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
1 votos
Comentarios

Cunqueiro en San Martiño