O Gaiás acollerá máis de 500 intérpretes de bandas de música nunha nova edición do Serán

O festival quere poñer en valor a súa relevancia artística e o seu labor social e docente, que desenvolven formando no seu seo ás novas xeracións de músicos

Detalle dunha das actividades da primeira edición do Serán celebrada no Gaiás, que se dedicou a un Encontro Galego de Cultura Popular sobre o baile e a música tradicionais
Detalle dunha das actividades da primeira edición do Serán celebrada no Gaiás, que se dedicou a un Encontro Galego de Cultura Popular sobre o baile e a música tradicionais
La Voz

Desta volta tócalle ás bandas de música. Máis de medio milleiro de intérpretes chegados de formacións de toda Galicia veranse no Gaiás -do 28 ao 30 de xuño- para participar no Serán’02, segunda edición do Encontro Galego de Cultura Popular. Promovido pola Xunta, retorna á Cidade da Cultura de Galicia na procura de impulsar e pór de relevo a cultura galega de base. Busca repetir o éxito da súa primeira entrega, que -dedicada ao baile e á música tradicionais- congregou máis de 7.000 asistentes.

Un avance do programa presentouse onte no xardín do teatro do Gaiás, coa participación do conselleiro de Cultura, Román Rodríguez, o presidente da Federación Galega de Bandas de Música Populares (FGBMP), Iván Estévez, e o director artístico do Serán, Quique Peón. No colofón, a Banda de Música Municipal de Valga interpretou un breve repertorio.

Ao longo das tres xornadas, o certame despregará un intenso programa con concertos de diversas bandas de música galegas, incluíndo un man a man entre as dúas únicas bandas municipais profesionais de Galicia (A Coruña e Santiago), e concertos de formacións infantís e xuvenís.

Outro dos pratos fortes será o Baile Irmandades da Fala, que convidará aos asistentes a achegarse caracterizados ao xeito daquela época para danzar na praza do Gaiás ao son das bandas de Lalín, Valladares, Santa Cruz de Ribadulla e a Lira de Ribadavia, e das charangas tradicionais de Xacarandaina, O Fiadeiro e Cantigas e Agarimos. Á noite repartiranse premios ao mellor vestiario e á parella de baile que demostre maior destreza.

O conselleiro eloxiou o feito de que esta segunda edición do Serán estea dedicada ás bandas de música, polo seu importante papel na cultura galega, «tanto pola súa relevancia artística como polo labor social e docente que desenvolven, formando no seu seo ás novas xeracións de músicos». Segundo datos da FGBMP, Galicia conta a día de hoxe con máis dun cento de agrupacións que aglutinan a uns 8.000 intérpretes e nas que aprenden música arredor de 5.000 rapaces.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Comentarios

O Gaiás acollerá máis de 500 intérpretes de bandas de música nunha nova edición do Serán