Un documental incide nas achegas de Antonio Fraguas á cultura galega

A Academia recupera o discurso de ingreso na institución que leu hai 63 o homenaxeado no Día das Letras Galegas este 2019

Fraguas celebra o seu aniversario no ano 1995 en Santiago
Fraguas celebra o seu aniversario no ano 1995 en Santiago

Santiago / La Voz

Revisitando a Antonio Fraguas é un documental que busca aproximar de xeito ameno a figura e as achegas a prol da cultura galega do homenaxeado este ano no Día das Letras Galegas. O traballo será unha das pezas centrais da exposición que se inaugurará o próximo mércores no Museo do Pobo Galego sobre Fraguas.

O proxecto audiovisual dirixido por Gonzalo Veloso conta coa participación de persoas que coñeceron a Fraguas, entre elas antigas alumnas, ademais de estudantes actuais do IES Rosalía. Entre os colaboradores están Justo Beramendi, Clodio González, María Xosé Fernández e Víctor Freixanes. «Falamos de espazos vitais facendo fincapé no propio Museo do Pobo e tamén na súa parte de mestre», asegurou Veloso, que onte presentou o traballo xunto ao director xeral de Políticas Culturais e representantes do Museo do Pobo. 

Discurso na RAG

Por outra parte, a Real Academia Galega publicou este mércores, coincidindo con 63 aniversario, o discurso de ingreso de Antonio Fraguas na institución e os orixinais mecanoscritos. No texto titulado As coplas que se cantaban nas ruadas de Loureiro de Cotobade. Roseiras e paxariños nas cantigas dun serán, o etnógrafo fía versos populares da súa terra. Fraguas, que pasou a ocupar o 8 de maio de 1956 a cadeira de Castelao, dedicáballe a el as primeiras palabras: «Confeso que sinto neste momento un medo tremendo, estremencente, medo que xurdiu no seu día e que vai aumentando a medida que, sen querer, hai que facer unha comparación. Veño a ocupar un lugar que quedou baleiro o día 7 de xaneiro de 1950 cando alá lonxe, en Buenos Aires, morreu Alfonso Rodríguez Castelao (...). Quizais fora mellor deixar vacante o seu posto deica que outro artista como el ou Rosalía, as dúas representacións de Galicia máis sinceiras e acabadas, viñera ocupar esta cadeira». A RAG tamén publica a resposta que lle deu Otero Pedrayo. 

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
6 votos
Comentarios

Un documental incide nas achegas de Antonio Fraguas á cultura galega