Dalí e Lennon xacobeos


Houbo historias descoñecidas que o xornalista galego Antonio D. Olano (Vilalba, 1938-Madrid, 2012) logrou descifrar e contar pola súa privilexiada relación con pintores como Picasso e Dalí, con toureiros de sona, con actores e actrices, con músicos, etcétera. Un tempo no que el mesmo luciu como dramaturgo de éxito e como animador da noite madrileña e dalgúns agostos coruñeses.

Por boca do propio Salvador Dalí soubo Olano que o pintor catalán, fascinado polos xeitos expresivos do movemento hippy, quería percorrer o Camiño de Santiago co xa exbeatle John Lennon e unha morea de seguidores floreados. Estabamos daquela a finais dos anos setenta, no fervor de Hippylandia, pero o asasinato de Lennon por un fan en 1980 púxolle un remate sen volta ao proxecto. O propio Dalí morrería dez anos despois. E o soño xa non tería continuadores de semellante talle e liderado.

O soño que Dalí compartiu con Lennon en varias conversas -e tamén mediante telegramas enviados nos anos setenta- comezara en Londres cando The Beatles aínda estaban unidos. A partir de aí principiaron as comunicacións co propósito de facer a peregrinación á fronte dun cento de hippys, unhas conversas que, ao parecer, non se interromperon ata o asasinato de Lennon. Aí acabou aquel soño.

A fascinación de Dalí polo apóstolo Santiago viña de vello. El xa pintara varios cadros con esta temática, e o monumental Santiago de 1957 representaba ao apóstolo achegándose a Deus no seu cabalo branco. E detrás desta visión chegoulle a do camiño xacobeo, no que acabaría por ver unha especie de festival de Woodstock móbil, cunha espiritualidade modernizadora de vellas tradicións. Algo concibido, por certo, contra a película A Vía Láctea (1969), de Luis Buñuel, que el tiña por irreverente e fóra de época.

De feito, parece que foi a estrea da película de Buñuel o que desatou o impulso floral-relixioso de Dalí para revitalizar o Camiño de Santiago e presentalo como a revelación actualizada dunha tradición cristiá. Un ano despois, Dalí observou, nunha conversa en Londres, que Lennon era receptivo á proposta. A partir de aí comezou a rodar o proxecto, finalmente frustrado pola morte do beatle.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Comentarios

Dalí e Lennon xacobeos