Esteban Batallán, entre Chicago e Hong Kong

O músico galego é trompeta principal na orquestra oriental e convidado na norteamericana, onde actúa baixo a dirección de Riccardo Muti

Esteban Batallán impartiu recentemente unha clase mestra en Vigo
Esteban Batallán impartiu recentemente unha clase mestra en Vigo

redacción / la voz

O trompetista Esteban Batallán (Barro, 1983) coñece ben a vida errante que a música impón sobre moitos intérpretes. Dende que se iniciou no estudo e práctica do seu instrumento con apenas sete anos, Batallán ten formado parte ou colaborado con orquestras de Galicia á India, de Ámsterdam a Porto, de Italia a Suíza. Na actualidade ocupa a praza de trompeta principal Hong Kong Philarmonic, ao tempo que colabora coa Chicago Symphony Orchestra en calidade de principal convidado.

Na formación norteamericana traballa cun nome mítico da dirección, o italiano Riccardo Muti, que imprime o seu carácter nunha orquestra que figura entre as mellores do mundo. Entre os factores que inflúen na pegada que un director pode imprimir entre os seus músicos, Batallán cita o «xesto» á hora de dirixir, «a maneira na que dirixe (carácter, mirada, o seu propio movemento corporal...), a súa idea sobre o que estea interpretando, como el pode ver e transferir a súa idea sobre a obra, como transmite a música, como trata ao grupo, como se expresa sen necesidade de falar...». Factores que, no caso de Muti, fan del alguén que «transmite a música con todo o seu ser e demanda do colectivo unha gran implicación en todos os aspectos». «Sen dúbida, é un gran director, indubidablemente o mellor intérprete da música de Verdi e a italiana en xeral despois de Toscanini», loa Batallán.

Para o trompetista galego, poder tocar con esta orquestra é un soño cumprido. «Podo perfectamente describir a sensación de tocar xunto coa xente que dalgunha forma idolatrei sempre, con eles crecín escoitando as súas gravacións e coas cales considero que aprendín a crear en min unha determinada forma de tocar simplemente analizando esas gravacións, meténdome a fondo nelas e tentando “imitar”, por así dicilo, un estilo, unhas maneiras, unha forma de percibir ou interpretar a música...», describe. Batallán considéraa a mellor orquestra sinfónica existente e é consciente de que poder tocar con ela é o resultado de moito esforzo e dedicación, pero que non rematou aquí nin moito menos. Unha vez acadada a posición de principal convidado, o trompetista galego xa está traballando arreo para optar a formar parte da Chicago Symphony Orchestra, xa que hai audicións convocadas para o vindeiro mes de xuño. Isto non significa que desatenda as súas obrigas en Hong Kong: «Teño varios meses por diante de tocar grandes obras do repertorio sinfónico (Mahler, Bruckner, Strauss, Tchaikovsky, Stravinsky..) co noso director musical, Jaap van Zweden, que tamén é titular da New York Philharmonic). 

Linguaxe universal

Así, entre Occidente e Oriente, transcorre a vida de Batallán, que forma parte desa gran ONU de músicos que participan dunha linguaxe universal, a música, e que fai que se lles entenda alá onde van. Un código do que Batallán tamén é mestre, xa que recentemente estivo na súa Galicia natal para impartir unha clase mestra no conservatorio de Vigo. Sobre a súa faceta docente, o trompetista cre que a clave está en transmitir non só coñecementos, senón ideas e actitudes. «Coas miñas vivencias intento fomentar o que creo que todos deberían de ter en conta: paixón pola música, polo instrumento, dedicación, organización, disciplina... e sempre desde a humildade, o respecto e a honestidade, valores que a veces se difuminan ou esquecen», relata.

Batallán confésase devoto de Wynton Marsalis, por integrar o mellor da clásica e do jazz, de Adolph Herseth -«o mítico solista de Chicago Symphony»-, Maurice Andre -«o máis destacado concertista do século XX»- ou Arturo Sandoval, «(unha estrela da música lixeira e do latinjazz». Todos eles figuras míticas da trompeta, un instrumento co que o galego afirma ter unha relación «totalmente emocional»: para el, igual que para moitos músicos, o instrumento é case un membro máis da familia ao que coidar.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
2 votos
Tags
Comentarios

Esteban Batallán, entre Chicago e Hong Kong